Shillong, Risaw, 30: Ka Sorkar Jylla ha ka Lah Sngi u Blei lyngba ka New Shillong Township Development Agency ka la aiti ïa ka jaka ban tei ïa ka Permanent Campus jong ka National Law University Meghalaya hapdeng ka jingïasoi soskular ka Meghalaya State Judicial Academy (MSJA) lyngba u Myntri Rangbah ka Jylla u Conrad K Sangma bad u Chief Justice jong ka Meghalaya High Court uba long ruh u Chancellor jong ka National Law University, Meghalaya u Sanjib Banerjee.
Ha jingaiti ïa ka jaka ha ka jingïalang kaba la long ha Mawpdang, Mawkhanu, Shillong la sakhi lang da ka Myntri jong ka tnat Aiñ ka Dr. Ampareen Lyngdoh, u Myntri ka tnat Pule Puthi u Rakkam A Sangma bad kiwei kiwei.
U Myntri Rangbah haba kren ha kane ka jingïalang u la ong ba ka jingtreikam jong ka Sorkar ka long kaba shai ban kyntiew shaphang ïa ka Jylla.
U la ong ba ka ri India kum ka ri kaba dang kiew shaphang bad manla ki samla ki dei ban noh synñiang na ka bynta ka jingkiew iriat jong ka ri. U la ong shuh shuh ki samla ki donkam ban ïoh ïa ki rynsan khnang ba kin dup lah ban noh synñiang sha ka imlang ka sahlang. U Myntri Rangbah u la ïathuh ruh ïa ki sienjam kiba ka Sorkar ka la buh hakhmat ban tei ïa ki jingshna bapher bapher ha ka jylla na ka bynta ki jingpule kiba shalor bad ki Professional Course.
U la bynrap ruh ba ka pule puthi bad ki jaka ai jinghikai pyntbit kim dei ban shu treikam tang ha ki shlem pule hynrei ki dei ban ïaid lang ryngkat da ka jingkyrshan jong ka Sorkar. “Ki samla kiba dang angnud ban bteng ïa ki jingpule kiba shalor ki lah ban noh synñiang na ka bynta ki jingdonkam jong ka Sorkar da kaba leh ïa ki jingwad bniah, ki jinglum jingtip bad ka jingbuh jingthoh,” u la ong.
U Chief Justice Sanjib Banerjee ha ka jingkren, u la ong, “ngi kwah ba kane ka skulbah kan long ka shlem pule kaba ngi lah ban ïasam ïa ki tiar bad ki buit. U la pynpaw ruh ka jingkyrmen ba kane ka skulbah ha ki snem ki ban dang wan kan pynrung ïa ki samla pule ba dei ki nongshong shnong bapura jong ka jylla.
U la kyntu ïa iwei pa iwei ban ai jingkyrshan ïa kane ka shlem ai jinghikai ka ban kiew rasong kum ka National Law University Meghalaya ha kaba kan sa long ruh ka shlem pule kaba lah ban paw hakhmat ka pyrthei.
Ha kane ka sngi, la sakhi lang da ki Nongbishar ka High Court, Meghalaya, u Vice Chancellor jong ka National Law University, Meghalaya u Professor Indrajit Dube, u Secretary ka Law Department Bah Cyril V. Diengdoh bad u Member Secretary jong ka New Shillong Township Development Agency u Bah E. Kharmalki.
