Nongpoh, Jymmang 17: Ka Social Economic and Life Development (SELD) Committee jong ka Nongjri District, ha ka jingïatreilang bad ki 8 tylli ki Balang Presbyterian, ka la lah ban plie paidbah bad aiti noh ïa kawei ka ïing ba la shna sngewbha sha ka Kong Therisia Mawphniang, kaba dei na ka Balang Presbyterian Syad Lyngdoh.
Ïa kane ka ïing, kaba dei ka jingai sngewbha na ka SELD Committee, la plie da u kongsan Rev. H.L. Khongwir, Moderator barim ka KJP Synod Sepngi, bad la sakhi lang da u Bah Charles Marngar, MLA ka Mawhati uba dei ruh u Secretary ka SELD Committee, ki nongïalam bad ki dkhot ka SELD Committee nalor ka Kong Therisia bad ïa kane ka iing la shna haka jinglut kaba la kot kumba T.3 Lakh.
Ïa kane ka ïing kaba la shna bha, la pynkyntang da u Rev. Khongwir da ka duwai kyrkhu, ba ka ïing kan long kaba skhem bad iohpdiang bun ki jingkyrkhu na U Blei.
Ha ka jingkren jong u Bah Charles Marngar, u la pynpaw ba ka jingdon jong ki longïing kiba dang mad jingeh bad kyrduh ha ka imlang ka sahlang ki dang bun, hynrei lyngba ka jingtrei shitom bad ka jingïatreilang, ka SELD Committee kala lah ban ïarap ïa ka Kong Therisia bad ka longïing jong ka. U la kyntu ruh ïa ka Committee ba kan dang bteng ïa kane ka kam babha khnang ba ki paidbah kiba don ha ka jingeh jingkyrduh kin ioh jingtngen.
Na ka liang ka Kong Therisia Mawphniang, ka la ai khublei kyrpang sha ka SELD Committee bad ruh ïa u Bah Charles Marngar, kiba la trei shitom ban pynurlong ïa kane ka ïing. Ka la pynpaw ruh ba kane ka jingai ka long ka dak jong ka jingieit ba kum ka longkmie kaba shem jingeh kan ioh ban shong ban sah ban rieh naka sngi u slap.
