Aiti ka MSEC ïa kaiphod ban pynbha ïa ka pule puthi, pynbna u CM ban thaw ïa ka Expert Committee

By Mawphor Editor On Aug 14, 2025

Shillong, Nailar, 13: Ka Meghalaya State Education Commission (MSEC) ha ka sngi Balang ka la aiti ïa ka kaiphod sha u Myntri Rangbah ka jylla u Conrad K Sangma ha ka jingïalang ba la donlang ruh u Chief Secretary ka jylla u Bah Donald P. Wahlang nalor ki dkhot ka State Education Commission bad ki ophisar na ka tnad pule puthi.
Ka kaiphod jong ka tnad pule puthi jong ka jylla Meghalaya ka long shaphang ka jingkylla ha ka liang ka pule puthi jong ka Jylla.
La thaw ïa ka Commission hapoh tnad pule puthi ha ka 26 tarik, Naitung, 2023 kum ka jingpyntreikam ïa ki mat ba kongsan kiba la kdew ha ka National Education Policy 2020 (NEP 2020).
Ka kaiphod ka wad bniah ïa ki bynta kiba kongsan kum ka jingpynskhem ïa ki skul, ka jingpynbeit thymmai ïa ka pule puthi ha ka kyrdan ba kham shalor, ka jingphah pyntbit ïa ki nonghikai, ka jingminot jong ki khynnah skul bad ka jingkylla ha ka rukom treikam hapoh ka tnad.
Da kaba shim na ki jingïamir jingmut ba bniah bad ki nonghikai, ki kynhun ba tbit bad ki seng nonghikai, ka kaiphod ka long kum ka bynta kaba kongsan na ka bynta ki nongshim bynta bad ki nongthaw polisi kiba saiñ dur ïa ka lawei jong ka pule puthi ha Meghalaya.
Ki bynta ba kongsan jong ka Meghalaya State Education Commission ki long ban weng ïa ka jingbym ïoh tulop jong ki nonghikai, ki buit treikam ban weng ïa ka jingpynslem ha ka thungkam nonghikai, ban pynjanai ïa ka pule puthi ha ki skul bad kolej, ban pynthikna ïa ka jingpule kaba bha ha baroh ki kyrdan pule puthi bad ban pyntreikam ïa ki nongrim jong ka NEP.
Ka kaiphod ka don ruh ïa ki jingai jingmut ba kongsan na ka bynta ka jingpule ha ki skul, ki jingpule ba shalor, ki skulbah jong ka jylla, ki kolej, ka jinghikai bad jingpyntbit ïa ki nonghikai bad ki Polytechnic.
Haba kren ha kane ka sngi, u Myntri Rangbah ka Jylla, u Conrad K Sangma u la ong ba ka State Education Commission ka long kaba kongsan bha na ka bynta ka tnad pule puthi ka ban saindur ïa ka lawei jong ka Jylla.
“Ngim kwah ba kane ka kaiphod kan shu thok bad kylla pumpum bad ka sorkar kan pyntreikam ïa baroh ki jingai jingmut jong ka Commission bad yn thaw ruh ïa ka Expert Committee kumba la ai jingmut da ka Commission ban shim ïa ki jingai jingmut bad ki jingtyrwa jong ka Commission,” u la ong.