Shillong, Jymmang 29: Ka All Meghalaya Labour Association (AMLA) ka la pynpaw ïa ka jingkyrshan pura ïa ka jingdawa ka VPP bad u Bah Ardent ban pynkylla thymmai ïa ka Reservation Policy bad ai por ruh ba ka sorkar ka dei ban sngap ïa kane ka jingdawa ban pynurlong noh ban pynpoi sha ka miej ka jingïakren hapoh 36 kynta lym kumta ka seng kan sa shim da ki sienjam kiba tyngeh.
Haba kren sha ki lad pathai khubor u President ka AMLAS u Bah Danny Dunai u la ong, “Ka seng ka ai por ïa ka sorkar 36 kynta ban khot ïakren ïa u Bah Ardent lada kata kam urlong na ka liang jong ngi ngin pynlong ka jingïakhih kaba tyngeh ban khot ïa ki nongtrei nongbylla, ki nongbuh dukan, ki ba treikam lajong bad kiwei kiwei ki jait kam ban khang dam shisyndon katba ka sorkar ka dang kuman bad hangta ka sorkar kan pei shkor ba ka thong ban kynjoh sha kata ka 10 billion dolar economy kan ym lah ban urlong lada ngim ïatreilang bad ka ïoh ka kot ka jylla kan khyllem hi lada ngi sahngeh ban trei ïa mkino kino ki kam”.
“Shuwa ba kan poi sha une u pud ba ngin ïakhih ka sorkar ka dei ban khot ïakren noh wut wut ïa u Bah Ardent namar kiei kiba u dawa ki long kiba dei hok shisha khnag ban lah ban ïoh ïa ka bhah ba dei hok kum ka jaidbynriew Khasi,” u la bynrap
