Shillong, Nailur 12 : U Myntri ka tnad C&RD ka sorkar jylla, Bah Hamletson Dohling ha ka sngi Nyngkong u la ïathuh ba ka sorkar pdeng ka la ailad mynta ban pyntreikam ïa ka skim bylla 100 sngi lane ka MGNREGS ha ki census town kiba don ha ka jylla.
Haba jubab ïa kane ha Ïing Dorbar Thawain ka Jylla, u Bah Hamlet u la ong ruh ba ïa kane ka mat u la ïakren bad ka sorkar pdeng da kaba kyrpad ban ai lang ïa ka skim 100 sngi wat ha ki census town ruh. Ïa kane u ong ba ki la leh hadien ba ki la ïoh ïa ka jingkyrpad na kiba bun ki MLA hadien ba ka la don ka jingseisoh ka jingpyntreikam ïa katei ka skim ha ki shnong kyndong.
“Nga la phah ar tylli ki shithi (DO Letter) sha u Myntri ka sorkar pdeng bad nga sngewkmen ruh ban pyntip ba u la ai ka jubab kaba bha ba ïa katei ka skim lah ruh ban pyntreikam ha ki census town ha ka jylla,” u la ong.
Da kaba pule ruh ïa shi bynta jong ka shithi kaba wan na ka Ministry, u Myntri u la ong, “Ka MGNREGA ka lah ban pyntrei pat tang ha ki census town kiba ym pat pynbna ba ki dei ki urban bodies bad cantonments….”
Halor ka jingkylli ba wanrah da u MLA ka Mawlai, Bah PT Sawkmie, na ka liang u Bah Hamlet u la ong ba katei ka skim kan treikam shen wat ha Mawlai census town ruh. U la pyntip ruh ba ka jingpyntrei ïa ka skim ha ki 13 na ki 15 tylli ki shnong kiba don ha Mawlai census town ka dang don bynta ha ka jingbishar bniah.
Na ka liang u MLA ka Umroi Bah George B Lyngdoh haba pan jingpynshai halor ka jingslem ban pyllait ïa ka pisa ba dang sah sha ki Village Employment Councils (VECs), u Myntri u la pyntip ba la dep ban bthah sha baroh ki BDO ba kidei ban pyllait noh ïa ka pisa ba dang sah sha ki VEC.
“Katba don ka pisa bad ka Department, la bthah ïa ki BDO ba kin pyllait noh ïa ka pisa kaba dang sahteng mardor,” u la ong. Katkum ka jingong jong u, ki don ruh ki bill kiba sahteng naduh u snem 2018 bad mynta ki dang pyrshang ban pynkhuid noh ïa ki ruh mardor.
Shwa kane, u Myntri u la pyntip ruh ba ha kane ka snem mang tyngka ka jingpynlut ha ka bai bylla sngi ka long 107.46 klur bad 316 klur ha ka bai tiar. U la pyntip ruh ba ka sorkar pdeng ka la ot ruh katto katne persen na ka MGNREGS ha ka jylla ha kane ka snem.
Katkum ka jingïathuh jong u, ka pisa kaba dang sahkut na ka bynta ban siew ïa ka bai thied tiar jong ki VEC ha East Khasi Hills ka long 40.47 klur tyngka.
