Ailad ka Finance Ministry ïa ka Meghalaya ban shim ram biang ban wanrah jingkylla ha tnad Bording

Shillong, Ïaiong, 08: Ka tnad Platyngka jongka sorkar pdeng ka la ailad ïa ka sorkar Meghalaya ban shim ram haduh 192 klur tyngka na ka bynta ban wanrah jingkylla ha ka tnad bording. Ka Meghalaya kadei kawei na ki 10 tylli ki jylla kiba ïoh ïa ka jingmynjur ban shim ram biang.
Ka kyrwoh na ka sorkar ha ka sngi Palei ka ong ruh ba ka Expenditure depart-ment jong ka Ministry of Finance ka la mynjur ban ailad shim ram biang haduh 28,204 klur sha ki 10 tylli ki jylla na ka bynta ban wanrah jingkylla ha tnad bording ha kane ka samoi treikam jong u 2021-2022.
La ong ruh ba ka tnat pla tyngka, katkum ki jingai jingmut jong ka Fifteenth Finance Commission ka la rai ban shah ïa ki jylla ba kin shim ram shuh shuh haduh 0.5% jong ka Gross State Domestic Product (GSDP) sha man ki jylla man u snem naduh u 2021-22 haduh u 2024-25 bad ïa kane la buh nongrim ha ki jingpynkylla ba ki jylla ki wanrah ha ki kam bording. Ïa kane la pynbna da ka Myntri jong ka tnat kam pla tyngka ha ka jingai jingkren shaphang ka mang tyngka ïa u snem 2021-22.
Ka thong jong kane ka jingai jingbit ban shim ram shuh shuh ban wanrah ïa ki jingpynkylla ha ki kam bording ka dei ban kyntiew ïa ka rukom pyntreikam bad ka jingïohnong ha ki kam bording bad ka jingkyntiew ïa ka jingpyndonkam ïa ka bording kaba la siew. Ki kyndon bad ki jingdonkam ïa kane la pyllait da ka tnat Expenditure ha ka 9 tarik u Jylliew 2021.
Khnang ban ïoh jingbit ban shim shuh shuh ïa kane ka ram, ka sorkar jylla ka hap ban sdang ban wanrah ïa katto katne ki jingpynkylla kiba la kdew shai bad ki dei ban lah ban pyntreikam katkum ki kyndon. Ki jingpynkylla ba ki jylla ki hap ban wanrah ki long – Ka jingshimti ka sorkar jylla ïa ki jingduhnong da ki public sector power distribution company (DISCOM). Ka jingshai ha ka rukom ai jingtip shaphang ki kam pisa ha ki kam bording kiba kynthup ïa ka jingsiew ïa ki subsidy bad ka jingbuh jingtip shaphang ki ram ki shah jong ki sorkar sha ki DISCOM bad ki ram ki shah jong ki DISCOM sha kiwei, ka jingai biang por ïa ki jingkhein jingdiah bad ki audit, ka jingbud ïa ki kyndon bad ki hukum.
La ong ruh ba shisien ba ka jylla ka la sdang ïa kine ki kam, la peit ïa ka jinglah ka jylla ban pyntreikam ïa kine khnang ban sngewthuh ki ïoh ne em ban shim shuh shuh ïa ka ram na ka bynta u snem 2021-22.
Ka percentage jong ka bording ba pyndonkam kaba lah ban thew lyngba ki meter ha ryngkat baroh ka bording kaba pyndonkam kaba kynthup ruh ïa ki connection na ka bynta ki kam rep, ka jingsiew subsidy sha ki briew lyngba ka Direct Benefit Transfer (DBT), ka jingsiew bai bording da ki tnat sorkar bad ki bor shnong, ka jingbuh ïa ki prepaid meter ha ki ophis sorkar, ka jingpyndonkam ïa ki jingsaindur thymmai bad ka teknoloji.
Shuh shuh la ong ba ki jylla ki lah ban ïoh ïa ki bonus mark haba ki lah ban pynkylla ïa ka jingpynïaid ïa ki kam ai bording sha ki kynhun shimet. La ong ruh ba ha u snem mang tyngka 2022-23, ki jylla ki lah ban ïoh shim ram shuh shuh haba ïadei bad ki kam kiba ïasoh bad ki jingpynkylla ha ki kam bording. La ong ba kan don haduh 1,22,551 klur kum ka jingpynshlur ïa ki jylla ba kin wanrah ïa kine ki jingpynkylla ha u snem 2022-23. Ki jylla ki bym shym la lah ban pyndep ïa kine ki jingpynkylla ha u snem 2021-22 ki lah ban ïoh jingmyntoi na ka jingïoh shim ram shuh shuh kaba la buh kyrpang na ka bynta u snem 2022-23, lada ki lah ban wanrah ïa kine ki jingpynkylla ha une u snem mang tyngka.