AIFF Super Cup 2025: Pynkhihjar u Samuel Lyngdoh ha ka jingjop kaba 3-0 jong ka Gokulam Kerala

Shillong, Naiwieng 06: Ka Gokulam Kerala FC ka la jop da 3-0 ïa ka Mohammedan Sporting ha ka jingïalehkai ba khatduh jong ka ha ka Group C ha ka lympung AIFF Super Cup 2025-26 ha GMC Stadium ha Bambolim, Goa, kaba la long ha ka sngi Balang, 05 tarik Naiwieng, 2025.
Ka Gokulam ka la pynsawa ïa ka sur ïalehkai da kaba pynkhih ïa ka kol kaba nyngkong lyngba u Albert Torras ha ka minit kaba 28, bud sa ka kol kaba la thep da u Samuel Lyngdoh (56’) ha kaba sdang jong ka kylla miet. Tang katto katne minit shuwa ban kut ka por, u Juan Carlos Rico (86’) uba la mih bujli u la bynrap ïa ka kol kaba lai ban pynskhem ïa ka jingjop jong ka kynhun bad kyntiew ïa ka sha ka kyrdan kaba lai ha ka miej kamai poiñ jong ka Group, ha kaba ka jingïaid lynti jong baroh ar tylli ki kynhun ka la poi sha kaba kut.
U Samuel Lyngdoh u la ïoh ban pynkhihjar hadien ka jingthombor kaba ïai bteng jong ka Gokulam. U Akshunna Tyagi u la rah pynstet ïa ka bol na ka liang kadiang ha ka minit kaba 56 shuwa ban pashat pat ïa ka bol sha u Samuel, uba la thep suk ban pynjlan ar shah ïa ka kol lamkhmat.
Da kane ka resol ka Gokulam ka la pynkut ïa ka jingïakhun jong ka ha ka Super Cup da tang kawei ka jingjop hadien ba ka la shah rem ha ki ar tylli ki jingïalehkai ba nyngkong pyrshah ïa ka Punjab FC bad ka Bengaluru FC.