Shillong, Naitung 14: Ki bor shipai jong ka Assam Rifles, Laitkor, mynta ka sngi ka 14 tarik u Naitung 2022 ka la ai sngewbha da ka Madan Basketball bad ka madan ïalehkai Badminton sha ka Nongkrem Youth Development Association- NYDA. Ia kine ki madan ïalehkai la ai sngewbha ha ka jingïalang kaba la long ha Nongkrem ha kaba la ïadon lang ruh ki nongkitkam jong ka NYDA, ki nongkitkam shnong ka dorbar Nongkrem , ki shipai Assam Rifles, ki samla bad ki nongshongshnong.
Haba kren ha kane ka jingïalang u Col. B. Vijay Kumar, uba long u Commandant jong ka Assam Rifles ba u kongsan jong kane ka jingïalang ha kaba u la plie ruh ïa kine ki madan, u la pynpaw ka jingsngewkmen ba la lah ban ai ïa kine ki madan ialehkai sha ka shnong ka ban long ka jingïarap ïa ki samla ba kin nang pyntbit shuh shuh ha ki sap ïalehkai ba ki don. U la ong ruh ba nalor kine ki madan, na ka liang ka Assam Rifles kan pynshna ruh ïa ka open air gym, kaba ka jinglut kan long kumba 4 lak tyngka. Ha kajuh ka por u la kular ruh ban peit ïa ki lad ki lynti ban pynkylla noh ïa ka kyrteng jong ka Assam Rifles Laitkor sha ka Assam Rifles Nongkrem.
