Nongpoh, Nohprah, 21: Ka HANM Western Ri Bhoi ha ka sngi Palei mynta ka taïew ka la leit sam da ki jaiñ syaid sha ki 28 tylli ki longïing baduk hapoh ka shnong Nongrim Jirang, shi bynta kum ka jingai sngewbha Christmas bad snem thymmai na ka bynta kitei ki longïing baduk sha ba kin pdiang ïa katei ka aiom lehkmen jong ka Christmas bad snem thymmai.
Haba sam ïa kitei ki jaiñ syaid la don ryng u President ka HANM Western Ri Bhoi u Bah Sumarlang Lyngdoh, u Rangbah Shnong ka Nongrim Jirang, u Bah Kle Rani, u President ka HANM Jirang Unit u Bah Wanbok Syngkli lem bad kiwei ki nongïalam.
Kane ka sngi ka la long ka sngi kaba kmen ïa katei ki longïing baduk, ha kaba da ka jingkylluid mynsiem ki nongïalam ka seng HANM Western Ri Bhoi, ki la ïoh pdiang ïa kitei ki jaiñ syaid, ha kaba u president u Bah Sumarlang Lyngdoh u la kyrpad ïa ki ba kin pdiang da ka mynsiem kaba kylluid wat la ka seng kam lah ban ai katkum ka jingangnud jong ki bad kane ka dei tang ka jingangnud ka seng ha kaba ha ka jingkotbor ka pyrshang ban kner ïa ki kti ban ïarap kyrpang tang ïa kito ki longïing baduk kiba donkam shisha ïa ka jingkyrshan jong ka seng.
Haba kren ha kane ka sngi, u Bah Sumarlang Lyngdoh, President ka HANM Western Ri Bhoi, u la ong ba ka seng ka la shim ïa kine ki sien jam ban phai khmat lem sha ki longïing baduk, ka dei ka jingangnud ka seng ban bteng ïa ka jingshakri bad ban phai khmat kyrpang sha kito ki longïing kiba donkam shisha ïa ka jingïarap ha ka imlang ka shalang.
U la ong ruh ba kane ka jingleit sam ïa ki jaiñ syaid sha kitei ki longïing baduk, ka long shi bynta ban ai sngewbha Christmad bad snem thymmai, ba ma ki ruh kin ïoh lem ban ïa lehkmen na ka bynta ban pidang ïa ka Christmas bad snem thymmai.
Shuh shuh, u la ai ruh ka jingkhublei Christmas bad snem thymmai sha kitei ki longïing, ba kane ka Christmas bad snem thymmai, kin long ki lad jingkyrkhu ïa ki, ba kin dang bit dang biang bad ruh ba kin dang don hapdeng ka met kaba koit ba khiah ba kum ka seng ruh ha ka jingkotbor kan pyrshan ban kner ïa ka jingshakri na ka bynta kito ki longïing baduk ba kyrduh ha ka imlang ka sahlang, u la bynrap.
