Nongpoh, Rymphang 21: Ka LS Syiemlieh Production, ka kynhun kaba la tip paidbah ha ka jingpynmih phlim, music video bad ki prokram pynsngewtynnad bapher bapher, ka la jied ban rakhe da ka rukom kaba kyrpang ïa ka sngi kha jong u CEO, u Bah Lansius Syiemlieh, da kaba pynlong jingai snam ei ha Blood Bank jong ka Nongpoh Civil Hospital.
Ïa kane ka prokram jingai snam la lamkhmat hi da u Bah Lansius Syiemlieh ryngkat bad ki dkhot ka kynhun, kum ka dak ka jingsngewnguh bad jingïarap sha ka imlang sahlang. Kane ka sngi ka long kaba kyrpang eh namar u CEO u la kynjoh sha ka 43 snem ka lyngkhuh sngi kha jong u.
Haba kren sha ki lad pathai khubor, u Bah Lansius u la ong ba ka jingïai snam kam dei tang ka jingrakhe ïa la ka sngi kha, hynrei ka dei ruh ka bynta ban noh synñiang sha kiba donkam snam kyrkieh ha ki por ba ki ïakynduh jingpang jingjynjar. U la pynpaw ruh ba watla ka kynhun kam lah ban siew kylliang ïa ka jingkyrshan jong ki paidbah ïa ki kam jong ki, hynrei lyngba kane ka sienjam, ki kwah ban ai pat ka jingïarap kaba don jingmut sha ka imlang sahlang ban pyni ba kum ka kynhun ka trei ym tang haki kam pynbyrngia bad pynsngewtynnad hynrei ruh haki kam shakri paidbah.
