Nongstoiñ, Ïaiong 6: “Ai sha ka pyrthei ïa kaba bha tam khnang ba ka pyrthei kan ai ïa phi ruh kumjuh”, ong ka kong Lipa Dweri DGM NABARD, ha ka jingplie mynta ka sngi ïa ka Carpentry Training programme kaba lai bnai ha Auditorium Hall Don Bosco, Nongstoiñ, ba la pynlong da ka GRASSROOT ha ryngkat ka jingïatreilang bad ka Don Bosco Tech Nongstoiñ.
Ha kane ka programme la wan ban ïashimbynta da ka kong C.R Sangma MCS EAC West Khasi Hills ha ka jingïadon ryngkat ki Officials ka NABARD, DCIC, Employment, Brother Quirinus, Director Don Bosco Tech Nongstoiñ, Carpentry Association bad 30 ngut ki trainees na West and Eastern West Khasi Hills District.
Kane ka training ka thmu ban ai jinghikai ïa ki khynnah samla ban ieng ha la ki jong ki kjat, khnang ba ynda ki la dep kin lah ban seng ïa la ka jong ka kam bad ban ai kam ruh kumjuh ïa kiwei pat ha kum kane ka juk kyrduh kam duh jam
Haba ai jingkren ha kane ka jingïalang ka kongsan ka kong Lipa Dweri, ka la pynshlur ïa ki trainees ban bteng ïa kane ka workshop na ka bynta ka lawei ka jingim jong ki. Ka la ong ruh ba ki trainees ki dei ban pynïasoh bad bun jait ki scheme bad ki programme, la ka long bad ka Government ne kino kino kiba ïarap pisa ban seng kam kum ki bank bad kiwei kiwei.
Ka la kyntu ba ki dei ban long tista bad biang ka por wan training, ym dei ban pynsepei wat tang shi sngi ruh, khnang ba kane ka training kan ïarap ban long ki nongseng kam ym ki nong wad kam. Ka la pynkut da kaba ong ba kane ka training ba lai bnai pura kan pynlong ïa ki, ki nongshna dieng ne misteri dieng kiba tbit tam ha ka District.
Ha kane ka sngi la ïoh ruh ïa ki jingrwai na ka Tarari Group, ki trainees bad ka jingplie ïa kane ka training da ka jingbuh ïa u Kwai bad Tympew. Kiwei kiba la ai jingkren ki long ka kong Lyntiborn Marngar, Team Lead Grassroot ba la pynïaid ïa ka jingïalang, kong C.R Sangma EAC, bah Utpal, DDM, NABARD, kong Mayfereen Rynta-thiang President Grassroot, Brother Quirinus, Director Don Bosco Tech bad kong Eulina Syiemiong, Administrator Grassroot ba la ai khublei pynwai.
