Shillong, Jylliew 20: U Chief Executive Member (CEM) ba thymmai ka KHADC Bah Pynïaid Sing Syiem, ha ka sngi Ba-ar, ula phah ïa ka thup kyrteng jong ki Executive Member ka Executive Committee ka KHDF ba ïalam da ka NPP sha u Lat ka Jylla Phagu Chauhan ban ïoh ïa ka jingmynjur.
Ha ka jingïakren bad ki lad pathai khubor, u Bah Pynïaid ula pynbna ba ïa ka shuki Deputy Chief Executive Member, ka shuki Vice Chairamn bad kawei ka shuki Executive Member, kan leit sha ka seng Congress.
Ka kyrteng jong u CEM barim ka KHADC uba la long teng ruh u Chairman ka KHADC u MDC ka Mawkhar-Pynthorumkhrah u Bah Pynshngain N Syiem, la tyrwa ban long u Dy CEM ba thymmai ka Council.
Ha kajuh ka por, u MDC ka Congress na Mawhati u Bah Charles Marngar, ula khreh ban shimti ïa ka shuki Deputy Chairman jong ka Council hadien ba u MDC ka NPP na Mawsynram Bah Alvin K Sawkmie, ula iehnoh ïa ka kam ha ka sngi Nyngkong khnang ban ailad ïa ka Congress ban ïoh ïa kane ka shuki.
Ka elekshon sha ka shuki Dy Chairman kan long mynta ka sngi Balang ha kaba u Bah Charles Marngar u dei u kyrtong ba marwei uba la thep kyrteng ban ïakhun ïa ka elekshon
U CEM ula pyntip ruh ba kito ki bym don ha ka EC kin sa ïoh ïa ka bhah kum ki Chairman jong ki Advisory Committee bapher bapher ka Council, ïa kiban sa thaw ba kin ai jingmut sha ka EC halor ki kam bapher bapher.
