Ai sabut ka HITO sha ka Sorkar MDA da kaba mudui ejahar ïa 18 tylli ki trok ki High Level

Shillong, Nailur, 07: U Symbud Myntri Rangbah ka Jylla u Bah Prestone Tynsong uba la kam um don jingtip eiei shaphang kita ki High Level kiba donkti ban khaii be-aiñ ïa u dewïong na kane ka jylla dang shen u la khot shakhmat ïa kino kino ki kynhun ne ki riewshimet ban ujor sha ka Sorkar lada ki ïoh sabut shaphang kine ki kam be-aiñ.
Ka Hynñiewtrep Integrated Territorial Organisation (HITO) ha ka miet synñia jong ka sngi Balang ka la pynlong da ka jingpynap shrip ha surokbah jong ka shnong Mawrynkneng, East Khasi Hills District ban ïohbat ïa ki trok kiba kit be-aiñ ïa u dewïong ban khaii shabar ka jylla Meghalaya ha kaba la kynnoh ba la pynïaid sop sop da kita ki High Level.
“Ngi la pynlong ïa ka jingpynap shrip ha ka por shiteng synñia haduh ka por 4 baje mynstep. Ngi la ïoh ban bat 50 tyli ki trok bad bun kiba la lait phet bad ngi la ïoh ban ujor da ka ejahar tang ïa ki 18 tylli ki trok ha Mawryngkneng Police Station,” ong u President ka HITO u Bah Donbok Dkhar ha ka jingïakren bad ki lad pathai khubor ha ka sngi Balang.
“Ngin sa ïa peit mynta hato ka Sorkar ka nud neem ban pynshitom namarba ngi don lut ki sakhi sabut naduh ki Video ba la ïoh ring dur ïa ki trok bad ïa ki nongniah,” u la ong.
Ha ka ejahar ka Seng ka la kdew ba ki trok kiba kit be-aiñ ïa u dewïong khlem ka Challan bad ki kot ki sla kiba biang ki dei kiba wan na rilum Jaiñtia ban leit sha Guawahati, Assam.
U Secretary jong ka HITO u Bah Wanbun N. Dkhar haba bynrap halor kane u la ong, “naduh u snem 2014 ka National Green Tribunal (NGT) kam pat weng satia ïa ka jingkhang ban tih bad shalan dewïong ha kane ka jylla jong ngi. Hadien ba ngi la ïohi ba kane ka Sorkar ka la pyrshang ban tap eitmiaw da kine ki kam jyrsieh ngi la kwah ban ai jubab sha ka Sorkar MDA ha kaba ngi la ïoh bat ïa ki trok kiba la kit ïa u dewïong kiba wan na rilum Jaiñtia sha Guwahati.”
U la kam ruh ba ki trok kiba la ïohbat da ka HITO ki dei kiba la shu kam trai da ki Khasi kiba leh Benami katba ki trai kali ki de kiba na Assam.
Une u nongïalam ka Seng u la kam ruh ba ki Pulit ka Mawryngkneng Police Station ki la kyntait ban pdiang ïa ka ejahar ba la mudui pyrshah ïa ki 18 tylli ki trok ha kaba u Second Officer Incharge ka Mawryngkneng Police Station u la ong ba ym lah satia ban pdiang ïa ka ejahar namarba katkum ka Notification jong ka tnat Mining and Geology, ka Sorkar Jylla yn ym lah satai ban register case ïa kino kino ki jingkhaii be-aiñ ïa u dewïong.
“Kaba pynlyngngoh ïa ngi, lada ïa u nongñiah kali u bym rah ïa ka Driving Lisence ki lah ban daiñ kuna hynrei balei pat ïa kiba kit be-aiñ ïa u dewïong ym lah ban register case,” la buh jingkylli une u nongïalam ka Seng ïa ka Sorkar bad bynrap, “don aiu sha lyndet ba ka Sorkar ka pyrshang ban thaw da ki aiñ Ïakjakor ban tap eitmiaw ïa ki kam jyrsieh.”
“Ngim banse ban ïaid sha ki bor ki bahalor wat ban leit tied ïa ka jingkhang jong ka Iingbishar na ka bynta ban ïoh ïa ka jingbishar kaba kot bad ban lap dien ïa ki buit sianti jong ka Sorkar kaba pyrshang ban da rapjot ïa kine ki jyrsieh bamsap,” u la ong.
U Bah Donbok Dkhar u la pyntip ruh ba ka HITO kan sa ïakynduh ïa u State President jong ka BJP ban ai dorkhas ban dawa ba la donkam ïa ka jingtohkit jong ka Enforcement Directorate (ED) bad ka Central Bureau of Investigation (CBI) ïa ki kam jyrsieh bad khamtam ha kaba ïadei bad ka jingkhaïi tuh ïa u dewïong.
“Ïa kine ki sakhi sabut kiba la ngi la ïoh lum ngin sa aiti sha u Justice BP Katakey,” la ïathuh u Bah Dkhar.
Ha kaba ïadei bad kane, u Myntri Rangbah ka Jylla u Conrad Kongkal Sangma u la len da kaba kyntait war ba kam don satia kano kano ka jingkhaii tuh ïa u deiwong hapoh ka Jylla.
U la kyntait ruh da kaba ong ba ka Sorkar ka la pynap pahara bun syrtap ha surok bad kino kino ki trok kiba kit be-aiñ ïa dewïong kin shah kem bad kin ngat beit ha ki kyndon jong ka aiñ.