Ai por ki ar seng 10 sngi ban buh pulit ha ka jaka ba thung dieng ka Assam, ym shapoh shnong briew

Jowai, Naitung 09: Ka jingïalang hapdeng ka Jaiñtia Joint Alliance (JJA) bad ka Hynñiewtrep Border Despute Redressal Forum HBDRF kaba la long hynnin ka sngi 8 tarik ha ophis treikam ka Jaiñtia Youth Federation JYF, Jowai.
Ha kane ka jingïalang la wan ban ïashim bynta da ki nongïalam ka Alliance na ka WjSU, JYF bad ki nongïalam ka Hynñiewtrep Border Dispute Redressal Forum, ha ka jingïadon lang u bah Alban K Gashnga, Chief Adviser cum Spokesperson ka JJA.
Kane ka kynhun ka la ïakren bad ïatai sani bha halor ka jingeh ki paid ka Ri kiba shong shnong ha ki thaiñ khappud bad ka jylla mar syndah ka Assam.
Halor ka jingjia ba dang shu jia shen ha ki thaiñ khappud Lapangap, kine ki ar kynhun ki la pynpaw ba ka jingleh sting bad leh meinah ka sorkar jylla bad kaba kren jam ha ki kot khubor ba ka lah buh da ki Police Force ha katei ka jaka ba wan tam pud da ka Assam.
Kine ki ar kynhun ki pyntip bad pynsngew sha ka sorkar ba ka jingïa kajia pud ha katei ka shnong kam ju don mynno mynno. Kine kiei kiei ki jia ba ka sorkar Assam ka wan knieh jubor ïa ka jaka ki paid ka Ri kiba shong ha katei ka thaiñ. Kane ka jingleh donbor ka sorkar Assam na ka liang ka sorkar Meghalaya ka kheiñ sting palat bad kane ka dang pynïoh bor shuh shuh ïa ka Assam ban khlong ïa ka khyndew ka shyiap jong ka Ri la ong ka seng.
Kine ki ar kynhun ki dawa na ka sorkar Meghalaya ba ka dei ban buh ïa ki pulit ha ka jaka ba la wan kam da ka Assam, ha kato ka jaka ba pynpra ïa ki temporary tent bad ki nursery ba thung beaiñ ka Assam ha u pud u sam ka shnong Lapangap ym ban buh ïa ki police force hapoh shnong poh thaw khamtam ka jaka ba encroached ka Assam ka dang jngai shibun na ki jaka ba sah ki briew. Ka sorkar ka dei ban pynkynriah mardor ïa ki police force ha katei ka jaka ba la dep kdew haneng, ym ban shu phah shong ïa ki ha shnong briew, kane ruh dei ban leh hapoh ka 10 sngi naduh ba pynmih ïa kane ka khubor.
Kine ki ar kynhun ki la ïatai bha halor ka jingleh kyllut ka sorkar jylla ïa ka Block-I kaba la ithuh da ka Jaiñtia Hills Autonomous District Council.
Halor kane, ka jingïalang ka dawa na ka sorkar Meghalaya ba kan ithuh ïa ka Block-I kum ka bynta jong ka jylla Meghalaya bad ban theh ïa ka roi ka par ha katei ka thaiñ kumba ka la leh ïa ka Block-II. Kyrmen ka sorkar jylla lyngba ka notification kan leh ïa kaba donkam khnang ba ki paid ka Ri jong ngi, ha katei ka dong ba dang sahdien kin mat ïa ka roi ka par bad ka shongsuk shongsaiñ.
Kine ki ar kynhun ka JJA bad ka HBDRF da leilei kim nym pdiang ba ka Lapangap ka don hapdeng ka ïa kajia pud bad ka Assam. Kane dei tang ka jingleh donbor ka jylla Assam nmr ka itroin ïa ka jylla.
Ka jingïalang ka la shim ïa ka rai ba hadien ka 10 sngi, kin ïa shong biang ban shim ki sien jam ba tyngeh khnang ba ki bor ka sorkar Meghalaya kim banse ban kyrpad ïa ka sorkar India ban tuklar lem ha kaba ïadei bad kane ka bynta (Assam state superseding the Full-fledged Meghalaya state despite both the entities were units of the Indian Union).
Kane ka long katkum ka kyrwoh ba la phah da ma Ombormi L Tariang, Chairman ka JJA, ma Everest Langstang Secretary, JJA bad u ma Chandame Sungoh, Chairman, HBDRF.