Ai por ka HITO 15 sngi ia ki trai dukan ban pynbiang Labour License ïa ki bar jylla ba shong dukan ha Khliehriat

Khliehriat, Nailur 06 : Ka Hynñiewtrep Integrated Territorial Organisation (HITO), Jaiñtia Hills, hynnin ka sngi ka 5 tarik nailur ka la pynlong ïa ka jingkhynra trading license bad Labour Licenseia ki dukan bad ki karkhana shna kali kiba din ha ka thaiñ Khliehriat bad ha kane ka jingkynra la lap ba ki don bun na ki dukan bar Jylla ki la don ïa ki Trading License bad lait tang katto katne tylli ki bym don Trading License bad naka liang ka seng kala khang noh shi syndon ïa kito ki dukan bym don Trading License.
Ha kaba ïadei bad ki Labour License pat bun naki nongtrei jong ki kharkhana, la lap ba kim don ïa ki Labour License bad ka seng kala ai por ïa ki trai dukan 15 sngi ba kin pynbiang ïa Labour License bad kumjuh ruh ia ki dukan ki bym don ïa ka Trading License.
Haba kren sha ki pathai khubor uwei na ki nongïalam ka HITO Jaiñtia Hills, uba dei u General Secretary HITO Jaiñtia Hills, u bah Burom Dkhar u la ong ba ka HITO ha kawei ka liang ka wan ban pynkhuid ïa ki jaboh kaba mut kine ki bar jylla kiba wan shong shnong ha kane ka jaka ki pynlong ne ktah ïa ka shongsuk shongsaiñ, ktah ïa ka imlang ka sahlang jong ki para briew “ngi la ioh pdiang bun ki jingunjor bad mynta ka sngi ka HITO ka la wan ban sakhi da kane ka jingjurip kynsan ïa kane ka jaka bad hadien ka jingkhynra ngi lap ba ki don hi ki bym pat biang ki kot ki sla kum ka trading license bad ka labour license”
U bah B.Dkhar u la ong ruh ba kane ka jingwan tur ki bar jylla ka la long kum ka jingknieh jubor ïa ki kam ki jam bad ïa ka kamai jong ki briew khasi pnar, na ka liang ka seng ka la maham ruh ba kim dei ban wan trei shane sha thaiñ khliehriat khlem da ioh jingbit na ki bor ka aiñ ne ki bor ba dei peit.
Ha kajuh ka por la ong ruh ba na ka liang ka HITO ka la iakynduh ruh ïa ki bor pynïaid shong jong ka shnong Khliehriat ha kaba na ka liang ki bor shnong ruh ki la kular ban iatreilang bad ka seng bad halor kane na ka liang ka seng ka ai khublei bad sngew nguh ïa kane ka jinglong la kloi ka shong ban ïatreilang bad ka seng.
Na ka liang ka seng kala kyntu ruh ïa ka Jaiñtia Hills Autonomous District Council (JHADC), ba kam dei shuh ban ai Trading License ïa ki bar jylla ha ki kino kino ki kam ba ki trai ri trai muluk ki lah ban leh hi namar kumba ka long ha ki snem bala dep ba ka JHADC kala shu ai pathar ïa ki trading licence sha ki bar jylla bad ka seng ka la lap ba ki la bun da ki bar jylla kiba wan kamai shane Khliehriat.
Utei u nongïalam ka HITO na Jaiñtia u kyntu bad ai mynsiem ruh ïa ki para doh para snam ba kin mih shakhmat ban seng la ki kam ki jam la jong namar bun ki samla ki la pyndep ïa ki jingshah hikai ne ki training bapher bapher bad kumta ki dei ban seng la ka kam la jong bad ong “Hato balei ngi ki pnar ngim lah mo ban leh ïa kine ki kam ba kine ki bar jylla ki leh”
Ha katei ka jingleit khynra trading license ka HITO Jaiñtia Hills la ïa don lang ki nongïalam jong ka HITO Central Executive Council ba kynthup u Working President, u bah Lawyerson War bad u General Secretary WN Dkhar lem bad ki dkhot.