Shillong, Risaw 02: U MLA ka BJP na South Shillong Constituency u Bah Sanbor Shullai ha ka sngi Balang u noh synniang da ka pisa na la ka tulop jong u kaba u la kynshew sha ki 29 tylli ki puja committee kiba don hapoh ka constituency jong ha kaba ïadei bad ka prokram ba la pynlong hapoh Community Hall jong ka Kenches Trace Lum Shatsngi.
Kane ka song pisa kaba u la sam ka la long kumba T. 9.1 lak. Haba kren ha ka jingïalang ha shwa ban sam ïa kine ki song jingïarap pisa u MLA u la ong ba ka sorkar jylla ha ka jingshisha kam shah shuh ïa ki nongmihkhmat ban ai ki jingïarap sha ki Balang ne ki niam la ka long ha kano kano ka rukom.
“Haduh mynta ngan long uba nyngkong eh ban ai ka jingïarap pisa ïa ki Puja Committee bad ha ki bnai ban sa wan pat ngan sa ai sha baroh ki kynhun Balang Khristan bapher bapher ka jingïarap pisa ha shwa ka jingrakhe ïa ka Khrismas,” ong u Sanbor Shullai.
U la ong ba kane ka jingai jingïarap pisa sha ki kynhun niam ne Balang ka long hadien ba u la ju ïohi ba ha ki por mynshwa ki la don bun ki dkhot ki niam ne Balang kiba ju leit lum donation na manla ki thliew ïing ha ki por ba don ki jinglehniam Puja ne ka jingrakhe ïa ka sngi Khristmas, kumta haba ïohi ïa kane la sngewdei ban ai ki lad jingïarap pisa sha manla ki niam haba don kum kine ki jingrakhe.
“Kumba 2. lak tam ka tulop ba baroh ki MLA ki ïoh manla ka bnai bad na kane nga kynshew manla u bnai ban ai kane ka jingïarap kumta kane kam dei satia na ka MLA skhim hynrei na ka tulop kaba nga la lum mynta lah 4 bnai,” ong u MLA.
