Shillong, Nailar 17 : Ka jingpynslem jong ka sorkar pdeng ban ai jubab halor ka jingdawa pyntreikam noh ïa ka Inner Line Permit ha ka jylla ka la pynlong ïa uwei na ki Myntri sorkar ka jylla, Bah Hamlet Dohling ban thoh da ka shithi sha u Myntri Kampohiing ka Sorkar Pdeng, u Amit Shah ban ïoh jingshai halor kane.
Nalor ka ILP, utei u Myntri u la pynkynmaw lang ruh wat ïa ka jingdawa jong ki nongshong shnong ka jylla ban pynrung noh ïa ka Ktien Khasi bad ka Ktien Garo ha ka Khyrnit kaba Phra jong ka Riti Synshar jong ka Ri India.
Haba kren bad ki lad pathai khubor, u Bah Hamlet u la ïathuh ba katei ka sienjam ba u shim kadei namar kum u nongmihkhmat bad ruh kum u nongïalam barim jong ka KSU u kwah ba ka sorkar pdeng kan kren da kaba shai la kin ai ne kim ai ïa kitei ki jingdawa ba ka jylla ka la dep ban pynsngew.
“Ym tang ba ngi la pass ïa ka Resolution hynrei ngi la kynduh ruh ha Delhi bad kumjuh ha Shillong bad u Amit Shah hynrei haduh mynta ngim pat ïoh ïa kano kano ka jubab la ka ktien Khasi jongngi kin pynrung neem ha ka Khyrnit kaba Phra ngim tip lane la kin pyntreikam neem ïa ka Inner Line Permit ha ka jylla jongngi ruh ngim tip. Ngi na ka sorkar, ki paidbah bad ki sengbhalang bapher bapher ki sah ha ka umdum halor kane ka ishu,” ong u Bah Hamlet.
Shuh shuh u ong ba dei na kane ka daw kum u nongïalam ba rim ka KSU bad ruh kum nongmihkhmat ka jylla um lah satia ban shu sngap kumto.
“Te nga sngew ba kadei ka kamram jongnga ban leh ei ei ban pyntikna ba ka sorkar India kan ai ka jingtip bad ka jingshai la ka long ne kam long. Kumta nga la thoh da ka DO Letter jongnga ha ka 25tarik u Naitung sha u Myntri Kampohiing ka Ri, u Amit Shah ban kyrpad ban pyntreikam noh ïa kitei ki artylli ki ishu, ka ILPbad ban pynrung ïa ka Ktien Khasi bad Garo ha ka Khyrnit kaba Phra jong ka Riti Synshar jong ka Ri,” u la ïathuh.
U Bah Hamlet u la ïathuh ruh ba naduh ba u phah ïa katei ka shithi bad tad haduh myna um pat ïoh satia ïa kano kano ka jubab na ka sorkar pdeng. U ong ruh ba u dang ap ïa ka jubab da ka jingthoh halor katei ka shithi ba u phah. “Teng teng lada shu kren shu kynduh kumto khlem buddien ngi sah ha ka lyngoh hynrei da kaba ai da ka jingthoh lada long ne ym long ruh ngin ïoh da ka jingthoh ba ki paidbah kin tip bad kin shai.”
