Tura, Nailur 24 : U Myntri Rangbah ka jylla u Conrad k Sangma ula leit ai mynsiem ïa ki samla pule ka College of Community Science, Central Agriculture University Sangsanggre, Tura ha ka jingrakhe ïa ka sngi ba la seng nongrim ïa kane ka college kaba la dap mynta 19 snem bad kumjuh ruh ia ka Annual College Week Celebration mynta ka sngi.
Haba kren ha kane ka jingïalang u Myntri Rangbah u la ai mynsiem kitbok kit rwiang ïa ki nonghikai bad samla pule ha kane ka jingrakhe ïa ka lyngkhuh sngi kha ba 19 jongka college da kaba u ong ba kane ka college ka don ka jingïadei ba jan bad u kpa jongu u (L) P.A Sangma Lamphang ka ïing dorbar thawaiñ Lok Sabha namar dei ma u uba la shim khia ban wanrah ïa kane ka college ha Tura.
U la ong kane ka college ym dei ba ka ai tang ka jingnang jingstad ha ka imlang ka sahlang hynrei ka wad bniah bad tih bniah ruh ïa kiei kiei kiba thymmai. U la ong hadien ka jingwad bniah bad lap ïa kiba thymmai kane ka college ka pynjanai ïa ki lyngba ki samla pule bad ka sa pynpoi sha ki paidbah bad kane ka la ïarap ïakiba bun ki samla ban ïeng ha la ki kjat.
U Myntri Rangbah u la kular ban ai ki jingïarap na ka liang ka sorkar lada ka college ka sdang ïa kano kano ka projek ka ban kyntiew ïa ki paid nongshong shnong.
Ha kane ka sngi ka Agatha Sangma MP ka la long ka symbud kongsan.
