Ai mynsiem u MLA Umroi ïa ka seng CoRP ban trei na ka bynta ki mat ba ktah ïa ka jaid bynriew

Nongpoh, Nailur 21: Haba leit shim bynta mynta ka sngi kum u symbut kongsan ha ka jingrakhe ïa ka jubili rupa ka seng Confederation of Ri Bhoi People (CoRP) ba kane ka seng ha Ri Bhoi ka la kynjoh sha u mawmer ba ar phewsan snem ka jingïaid lynti ban shakri na ka bynta ki paidbah, u MLA ka Umroi, u Bah George B Lyngdoh u la pynpaw ka jingkmen ba kane ka seng ka la dang khlaiñ bor ha ki kam shakri ïa ki paidbah bad ha kawei pat ka bynta u la ai mynsiem ïa ki nongïalam ka seng kumba ki la shakri baroh shi katta ki dang dei ban bteng ka jingshakri bad ka jingshakri ka long ba ki hap ban peitngor bad ban trei na ka bynta ki mat kiba ktah ïa ki paidbah bad khamtam ïa ka jaid bynriew.
U Bah George B. Lyngdoh u la pynpaw ruh ba u sngewkmen ban tip ba kane ka seng ka la ïaid lynti ban shakri haduh 25 tylli ki snem naduh ba la suit la shor ïa ka bad u sngewthuh shai ruh kumba la pynpaw da ki nongïalam ba ka jingseng ïa kane ka seng ka long ban shakri kyrpang na ka bynta ki paidbah ka dong Ri Bhoi.
“Nga sngewthuh shai ba ha ka jingïaid lynti ban shakri ïa ka eh ka shon ki paidbah kum ki nongïalam seng ki la hap ban mad shibun ki jingeh bad ki jingtynjuh bad namar ka jinglen lade ki nongïalam kane ka seng ka la lah ban kynjoh sha ka jingïaid lynti ba 25 snem ka jingshakri halor ka thong ban trei na ka bynta ka bha ka miat bad ka roi ka par ki paidbah ha Ri Bhoi” ong u Bah George B. Lyngdoh, MLA ka Umroi.
Nalor ki jingai mynseim bad ka jingpynshlur ïa ki nongïalam ka CoRP ba kim dei ban shongthaid ne sangeh noh ïa ka kam shakri paidbah, u Bah George B. Lyngdoh u la ong ba kum ki nongïalam seng haba shakri na kabynta ki paidbah ki dei ban peitngor nyngkong eh ïa ki mat ki jura kiba ktah ïa ki paidbah, namar ka thong ka seng ka dei hi ban trei na ka bynta ki paidbah bad haba ki trei ki dei ban trei ne shakri ïa kino kino ki mat kiba ktah ïa ki paidbah bad ka jaid bynriew hi baroh kawei.
Ha kawei ka bynta, kaba u la kren nalor ka jimgma kaba ap mynta na ka jingkynrei u drok ba bun ki khun samla ki la jot, u Bah George B. Lyngdoh u la kyntu ruh ïa ki nongïalam seng ba ki hap ban don lang ka jingkitkhlieh ban ïa pynduh jaid kum kine ki jingdih ba sniew kaba ktah ïa ka imlang ka sahalang bad u la pynpaw ruh nalor ba ki jingsniew ki la dang kynrei ha kine ki sngi kaba sngewsih ka long ba mynta ka sorkar ka la thmu ban wan rah sa ïa ka ktem khalai ba la tip kum ka Casino ba kum ki nongïalam ki hap ban tih bñiah bad ban pyrshah jur namar ka jingwan katei ka ktem khalai kan nym ktah tang ïa ki longing longsem bad ka la ruh ban pynmih shibun ki jaid jingsniew khamtam ka jingma na bynta ki kynthei ki khynnah, u la bynrap.