Shillong, Nailar 01: U MLA ka Mawkynrew Constituency, Bah Banteidor Lyngdoh uba dei ruh u Myntri ba dei khmih ïa ka tnad kam rep kam riang bad kam ïalehkai ka Sorkar Jylla ha ka 30 tarik u Naitung, 2022 u la noh synñiang da ka jingïarap pisa sha ki Village Organization (VO) kumjuh ki Self Help Group (SHG) kiba hap ha ki shnong bapher bapher ka Mawkynrew Community and Rural Development Block.
Kane ka jingnoh synñiang u MLA ka la long ha ka jingïalang ïamir jingmut bad ki nongïalam ki VO bad SHG ha ka School Hall ka Good Shepherd Higher Secondary School, Jongksha ha ka jingïadonlang u Sordar ka Shnong Jongksha, Bah Olet Kharsahnoh, u Principal ka Good Shepherd HSS, ka Kong Amanda Pakynteiñ, kurim u Bah Banteidor Lyngdoh nalor kiwei pat.
ïa kane ka prokram la khot pynlong da ka jingïatreilang hapdeng ka Shlem Jingkyrmen VO ha ka jingïalam ka Kong Ailibon Khriam kum ka President bad ka Tbeh Jingshai VO ha ka jingïalam ka Kong Synsharlang Kharsahnoh kum ka President nalor ki nongïalam na ki SHG bapher bapher. Ha kane ka jingïalang ki longkmie na ki VO bad SHG ki la ai ïa ki jingrwai, ki skit bad ki jingshad tynrai.
U Bah Banteidor haba kren ha kane ka jingïalang, u la ong ba kane ka jingïatreilang ki longkmie ha ki SHG bad ki VO ka pyni ïa ka lynti sha ka jingkiew ha ka ïoh ka kot ha ka imlang sahlang namar lyngba ki VO bad SHG ki ïarap bad kyntiew iwei ia iwei pat. “Kane ka pyni ïa ka jingïatylli hapdeng ki longkmie ban kyntiew ïa i wei pa iwei pat”, u la ong.
Da kaba ai jingkular ban ïai ïatrei lang ban nang kyntiew ïa ka jingdon ki SHG bad VO, u Bah Banteidor u la ong ba un sa ïarap na ka bynta ban shna ïa ki ophis treikam jong ki VO na ka bynta ban pyntyllun ïa ki kam jong ki ha ka ban ïa kyntiew ïa ka imlang sahlang. “Ka jingïatreilang ha ki SHG bad ki VO kan kyntiew ïa ka ïoh ka kot”, ong u Bah Banteidor.
U la ong ba ïa mynta ki don 300 tylli ki SHG hynrei donkam ban pynbun shuh shuh ïa ki ban ïatreilang ha ki kam bapher bapher la ka long ha ki kam kiba ïa dei bad ka rep ka riang ne kiwei pat ki jait kam. Ki nongai jingkren ha kane ka sngi naduh ka kurim u Bah Banteidor ki la pynpaw ka jingai mynsiem ïa ki longkmie ban nang ïai ïatreilang na ka bynta ka imlang sahlang.
