Ai mynsiem ka MDC-Narpuh ïa ki samla ba pyndep ïa ka Diksha Beauty Care Course na JEC Khliehriat

Khliehriat, Jylliew 07 : Ka MDC jong ka Narpuh Constituency ka kong Deiwipaia Tongper, kum ka kongsan ha ka jingialang hynnin ka sngi ha conferrence hall ha Jaiñtia Eastern College Khliehriat ka la ai mynsiem bad pynshlur ïa ki laiphew ngut ki samla kiba na East Jaiñtia Hills District kiba la pyndep ïa ka jingshah hikai ïa ka Diksha Beauty Course na Jaiñtia Eastern College Khliehriat, kane ka shlem ai jinghikai ka dei kaba la kyrshan da ka Bharat Dalmia Foundation kum shibynta ban iarap bad kyntiew ïa ki samla kiba don ka jingangnud ban long kum ki nongpynbhabriew ne ki beautician.
Ka kongsan ka la ai ruh ki kyntien sneng kyntu kynpham ïa ki samla kiba shah hikai ha kane ka bynta bad kyntu ïa ki ba kin trei shitom bad shimkhia bad ruh ka khmihlynti ba kin long kita ki samla kiba paw kum ki beautician, ka la ai khublei kyrpang bad ai ka jingkitbok kitrwaing ïa u Principal jong ka Jaiñtia Eastern College, u Dr Phervision Nongtdu uba la noh syniang shikatdei eh ha kaba kyntiew ïa ka jingnang jingstad ha East Jaiñtia bad uba la lah ban pynurlong ruh ïa kane ka shlem ai jinghikai ïa ki samla kiba don sap ha ki kam ban pynbhabriew, kumjuh ruh ka ai khublei ïa ka Bharat Dalmia Foundation halor ka jingkyrshan lem ïa kane ka shlem ai jinghikai bad ong ruh ba ka Bharat Dalmia Foundation ka la leh bun ki kam na ka tnat CSR bad khmihlynti ba kan nang theh shuh shuh ki lad pynroi ha ka thaiñ.
U Principal jong ka Jaiñtia Eastern College, u Dr Phervision Nongtdu u la iathuh ba kane ka Diksha Beauty Care Course ka dei ka shlem ai jinghikai ïa kito ki samla kiba don sap bad kiba don ka jingthrang ban long kita ki nongpynbha briew ne ki buautician bad ïa kane ka shlem ai jinghikai la bei tyngka bad kyrshan da ka Bharat Dalmia Foundation, u la ai khublei ïa ka kongsan kaba la kloi ban ïa don bynta lang ha kane ka prokram, kumjuh ruh u la ai khublei ïa ka Bharat Dalmia Foundation kaba la kyrshan ïa kane ka project ka ban iarap shikatdei eh ïa ki samla ym tang ha kaba ioh jinghikai hynrei kane ka project ka don ruh ka lad ka lynti ban kamai pisa bad kan long ka lad iohkam iohjam ïa ki samla.
Na ka liang u Corporate Affairs Head jong ka Dalmia Cement Bharat Ltd, u Ashim Das Laskar, u la ai ka jingbatai ba kham bniah halor kane ka Diksha Beauty Care Course kaba don mynta ha Jaiñtia Eastern College Khliehriat, u la batai shai ruh ïa ki samla kiba shah hikai halor kumno ban pynrung kyrteng ialade ha National Skill Development Coorporation (NSDC) Portal ha kaba ka CII pat kan iarap ban pynioh ïa ki lad ki lynti ba kin ioh jingtrei ha ki jaka bapher bapher ha India bad kane ka long ka lad iohkam ioh jam na ka bynta kito kiba la pyndep ïa ka jingshah hikai ne ka course.
La ioh ruh ka jingkren na ki khynnah kiba la pyndep ïa kane ka Diksha Beauty Care Course ha kaba ki la pynpaw ka jingsngew kmen ba ki la ioh ka kane ka lad namar ynda ki la dep lut ki jingshah hikai ki lah ban seng kam la jong ka ban long ruh kum ka lad iohkam iohjam ïa ki, ki la ai khublei ïa u Principal jong ka college bad kumjuh ruh ïa ka Bharat Dalmia Foundation kaba la kyrshan ïa kane ka project ka ban wanrah jingmyntoi ïa ki samla.
Kiba la ai jingkren ki kynthup ruh u Profesor D.Papang, u Profesor N.Rymbai.
Ha kane ka prokram, ka kongsan, u Dr P.Nongtdu lem bad ar ngut ki heh jong ka Dalmia Bhatar ki la sam ïa ki khusnam bad ki syrnot sha ki laiphew ngut ki samla kiba la pyndep ïa ka jingshah hikai kaba dei ka Diksh Beauty Care course na Jaiñtia Eastern College Khliehriat.