Ai mynsiem ka FKJGP ïa ka longïing ba shah thombor i khunlung ba dang 1 snem 8 bnai

Mawkyrwat, Naitung, 17: Ha ka 16 tarik u ‘Naitung, 2022 ka Federation of Khasi Jaiñtia & Garo People’s (FKJGP) jong ka South West Khasi Hills District, hapoh ka jingïalam u General Secretary, bah Balse Kharbani bad u Senior Vice President, bah Ferdinand Iawphniaw ki la leit ïa kynduh bad ai mynsiem ïa kiba ha ïing ha sem jong i khyllung ba shah leh don bor ha kine ki kyndiat sngi.
Ha ka kyrwoh khubor na u bah Balse Kharbani, General Secretary ka Federation of Khasi Jaiñtia & Garo People’s (FKJGP) jong ka South West Khasi Hills District u la ïathuh ba haba ki la ïa kynduh bad u kpa jong i khyllung u la pynpaw ba kum ka ïing ka sem ka dap da ka jingsngewsih ba u lyoh ba dum u wan ban kah ïa ka ïing ka sem khlem da poi pyrkhat. Hadien ka jingïakren bad tip ïa kaba la jia baroh, ki nongïalam jong ka seng ki la kular ha khmat u kpa lada u ne ka ïing ka sem ki donkam ha kano kano ka por ka seng kan don lypa ha syndah bad ki.
Namarkata, kum ka dak ban ïa sngewkhia lem halor kane ka jingjia ka seng ka la ai jingïarap ba rit heh kaba long tang kum ka dak jong ka jingkitbok ïa i khyllung ba in nang koit nang khiah bad ïoh ïa ka met kaba khlaiñ.
“Sa shi sien pat ka seng ka kyntu ïa ka ki bor jong ka aiñ naduh ki nongbishar badonburom ki ba shim ïa ka jingtohkit ba ki dei ban pynshitom ha ki kyndon aiñ kiba kham eh khnang ba kine ki jingjia kin nym jia shuh hadien habud”, ong u General Secretary bad bynrap, hynrei la lada ki bor jong ka aiñ kin pyngngat ha ki aiñ kiba long jem palat kan wahrah jingpynshler pynban hadien habud. Kumta ka aiñ ka dei ban pynshitom tyngeh ïa u briew ba u lah nud ban leh ïa ka kam kaba ym lah ban pdiang shuh ïa ka imlang sahlang, pynkut ka kyrwoh na u General Secretary ka Seng.