Shillong, Ïaiong 25 : U MP ka Lok Sabha ba dei ruh u President ka Meghalaya Pradesh Congress Committee (MPCC) Bah Vincent H Pala ha ka sngi Nyngkong u la ai ksai ba u lah ban ïakhun hi ïa ka elekshon MLA na Sutnga – Saipung constituency hadien ba u MLA ba jop na ka party, Bah Shitlang Pale u la leit ban ïasoh noh sha ka Trinamool Congress.
Haba kren bad ki lad pathai khubor u Bah Pala u la ong, “Kam dei shuh ka khubor hamsaïa hynrei kadei ka jingshisha namarba hadien ba u ma Shitlang Pale u la phet noh na ka party jongngi bad leit Trinamool bad mynta nga sngew in sa leit pat sha kawei ka party. Te haba ngi long jingïalang ki paidbah ki ong ba donkam u briew uba biang bad kumta haba la jied saw san ngut ki briew ba bun hi ki nongkyrshan ka party, kynthup naduh ki rangbah shnong bad ruh ki riewniam ki la wan shanga bad pynbor ïanga ban ïaleh.”
Nalorkata u ong ruh ma u ruh u hap ban mynjur haba u ba bun u paidbah u ong ïanga ban ïaleh. Lada ïa kiwei nga pynbor bad leit khroh balei ïalade ngan kynran dien. “Te nga ruh nga don ka jingmut bad nga lah ruh ban ïakhun. Tangba ka rai kaba khatduh kan dei ynda ngi la don shwa ka jingïalang namar ngi kwah shwa ban peit kumno ka long kane ka jingkhih phaloh halor ka jingleit ïasoh na kawei ka party sha kawei pat,” u la bynrap shuh shuh.
Shuh shuh u ong ruh ba kim kyrkieh satia namar ki la don lypa ïa ki nongkyrshan kiba skhem ha ki shnong ki thaw bapher bapher. “Tang kawei kaba nga sngewtynnad ka long ba kat shaba nga leit ki ong ba ïai shah, ïai neh bad wat ym khih ka Congress kan sa wan namar bun ki paidbah mynta ki la phai lut sha ka Congress.”
U Bah Pala u ong ruh ba ka thong jong ka party ka long ban ïoh ïa ki kyrtong kiba khuid bad ki bym don jingthoh bria. “Kumta, ngi kwah ba naduh ka por ba ngi ai ïa ka tiket ngin da bishar thik pa thik ym ban ai tiket ïa ki briew kiba don dak,” u la bynrap shuh shuh.
Lah ban kdew hangne ba ka Congress kaba don haduh 17 ngut ki MLA mynta kam don shuh wat tang uwei ruh u MLA hadien ba 12 ngut ki la leit ban ïasoh noh sha ka All India Trinamool Congress bad san ngut kiwei pat ki la leit ban kyrshan noh ïa ka sorkar MDA ba ïalam da ka NPP bad UDP.
