Ai khusnam Maitshaphrang KSU ïa ki samla pule kiba pas bha bad ki nongïalehkai sports

Shillong, Risaw, 13 : Ka Khasi Students Union, Mawlai Circle ha ka sngi Saitjaiñ ka la sam da ka khusnam Maitshaphrang Excellence Award, 2025 ïa ki samla pule kiba shong basah ha jylli ka shnong Mawlai kiba la pas bha shakhhmat ha ki eksamin bapher bapher naduh ka kyrdan Secondary School Leaving Certificate haduh ki samla kiba la pyndep ïa ka Ph.D kum ka jingpynshlur ba kin nang ïai minot shuh shuh ïa ki jingpule kiba kham shajrong.
Shwa ka jingsam ïa ki khusnam, ka seng ka la pynlong ruh ïa ka jingïakob dro bad ka extempore speech hapdeng ki khynnah skul ha kaba ïa ka nam lahduh ha ka jingïakob dro la jop da i heprit Lahunshisha Wanniang na ka Ai Jingshai English Secondary School, Mawiong bad ïa ka kyrdan kaba ar la ïoh rah da i heprit Bakitbok Malngiang na ka Phudmuri Higher Secondary School bad ïa ka kyrdan kaba lai la ïohrah da i heprit John Defender Pator na ka 1st MLP Battalion Secondary School, Mawiong.
Katba ha ka jingïakob Extempore Speech, ïa ka nam lahduh la ïohrah da i Rebecca Nongkynrih na Sacred Heart Girls Higher Secondary School, ïa ka kyrdan baar la ïohrah da u Meshwa Nongdhar na Umrynjah Presbyterian Secondary School, bad ïa ka kyrdan kaba lai la ïohrah da u Ethaniel Kupar Kharbyngar na Sacred Boy’s Higher Secondary School.
Nalor ka jingpynkup burom ïa ki samla ka KSU ka la pynkup burom ruh ïa ki samla nongïalehkai sports kiba la jop ha ki kyrdan ïalehkai bapher bapher kiba la long shabar ka jylla.
Ha kane ka sngi, la sakhi lang da u President ka KSU u samla Lambokstarwell Marngar uba la long kum u kongsan, u Principal ka Shillong College u Dr. S. Khongwir uba la long kum u symbud kongsan, u Education Secretary ka KSU Sengkmie u samla Pynkmenlang Sanmiet uba la long kum u kongsan ba kyrpang, ki nongïalam ka KSU Mawlai Circle, ki nonghikai bad ki khynnah skul.