Ai khusnam ka tnat Tourism ïa ka TPTS Wahkhen ba pawnam u Mawryngkhang
![](https://mawphor.com/wp-content/uploads/2022/05/mawphor-1-1.jpg)
Shillong, Nailur, 30: Ka tnat Tourism jong ka Sorkar Jylla ka la pynkup burom da ka khusnam ïa ka Tourism Promoter Treking Society (TPTS) Wahkhen, ka kynhun kaba lamkhmat ban pynpawnam ïa u Mawryngkhang kum ka jaka jngohkai pyrthei ha ka shnong Wahkhen tang da kaba shna ïa ka lynti ïaid kjat da ki siej ha shiteng riat ban sam ïa ka lynti ïaid ban poi sha u Mawryngkhang.
Ïa ka khusnam la pynkhamti ha u Babu Kular Khongjirem da u Myntri ka tnat Tourism ha ka jingrakhe dang shen jong ka Jylla ïa ka World Tourism Day ha State Convention Centre, Shillong hadien ba ka Indian Responsible Tourism ka la ithuh ïa ka jingshna ba kham phylla ha ka shnong Wahkhen.
Ïa kane ka lynti ïaid kjat ha shiteng riat la shna da ki kti ha ka 14 tarik, Kyllalyngkot, 2017 da ki katto katne ki nongshong shnong jong ka shnong Wahkhen ki riewtbit ha ki kam shna jingshna da ki siej.
Ka thong ba hakhmat eh jong kane ka Society ka long ban kyntiew ym tang ïa ki kam jngohkai pyrthei ha ki jaka nongkyndong hynrei ban plie ruh ïa ki lad aikam aijam na ka bynta ki nongshong shnong lyngba ki kam jngoh kai pyrthei.
Kane ka kynhun ka la bei lut nadong shadong nalade hi ïa ki jinglut jingsep ban shna ïa ka lynti ïaid kjat da ki siej ha shiteng riat.
Ka Society kam ïoh jingïarap wat shi naïa ruh na ki tnat sorkar lane wat na kino kino ki nongmihkhmat ban ïarap ha kaba shna bad maramot ïa ka jaka jngohkai pyrthei ha shiteng riat.
Ka lynti ba la pynjingkieng da ki siej ban poi sha u Mawryngkhang ka dei kaba la shna da ki nongshong shnong kiba long ki dkhot jong ka Society ki bym don jingnang jingstad kum kita ki Engineer lane ki Architect hynrei kiba don pat ka jingtbit nalae bad kiba don ïa ka sap kaba kham pher.