Ai khusnam ka JEC Khliehriat ïa ki samla ba ladep shah pyntbit ha ka DIKSHA Beauty Care Course

Khliehriat, Naitung, 6: Ka Jaiñtia Eastern College Khliehriat (JEC) ha ka 4 tarik mynta u bnai ka la sam khusnam lem bad ki syrnot sha ki samla kiba la pyndep ïa ka Beauty Care Course Batch-2 bad la pynlong ruh ïa ka Orientation Programme na ka bynta ki samla kiba dang shah hikai ha ka Batch 3.
Ïa ka ka shlem ai jingjinghikai ban pynbhabriew ne ka Beauty Care Course, kaba la don mynta ka jan shi snem ha Jaiñtia Eastern College Khliehriat la tip kum ka DIKSHA Beauty Care Course ba la bei tyngka da ka Dalmia Bharat Foundation.
Haba kren kum u kongsan, u Sub-Divisional Officer (Sadar), East Jaiñtia Hills District, u Manish Kumar, IAS, u la ban jur halor ka jingdon ka jingkutjingmut, ka jingtreishitom bad ka dor jong ka jingshimkhia ïa kano kano ka kam ban poi sha ka thong, u pynshlur ïa ki samla ki ba shah hikai ha kane ka shlem Beauty Care ba ki dei ban trei shitom ban poi shaduh ka thong ban long kita kiba im kamai ne ki entrepreneurship bad ruh ba kin pyndonkam hok ïa kino kino ki jingïarap ba ki ïoh na ka sorkar ruh ba kin long kiba lah ban ieng hala ki jong ki kjat ban long ruh ki nongai kam ïa kiwei, ha kajuh ka por u la ai ka jingkhublei kitbok kitrwiang ïa baroh kiba shah hikai ha kane ka shlem ai jinghikai bad ai mynsiem ba ki dei ban pyndep ïa ki jingshah hikai haduh ba kut ban rah ruh ïa ka nam ka burom jong ka College bad ka NAAC Accreditation.
U Manish Kumar u la ai ruh ka jingïaroh ïa ka jinglah u Principal ka college, u Dr P.Nongtdu ha kaba kyntiew ïa ki samla ym tang ha ka pule puthi hynrei wat ha ki lad ïohkam ïohjam ruh lyngba ki course bapher bapher kiba don hapoh ka college.
Haba kren ha ka jingïalang, u Dr. P. Nongtdu, ube dei u Principal jong ka Jaiñtia Eastern College Khliehriat, u la pdiang sngewbha ïa baroh kiba la wan sha kane ka prokram kynthup naduh kito kiba shah khot sngewbha, kumjuh ruh u la ai ki kyntien pynshlur bad ai mynsiem ïa ki samla pule kiba shah hikai ha kane ka shlem ai jinghikai ban pynbhabriew ne ka Beauty Care Course, u la kyntu ïa ki ba kim dei ban sangeh noh hynrei ba kin ïai bteng ïa ka jingshah hikai haduh ba kin da poi sha ka thong, u la ai khublei ïa ka Dalmia Bharat Foundation kaba la ai ka jingkyrshan ha kaba ïadei bad kane ka shlem ai jinghikai ïa ki samla kiba don ka sap bad kiba angnud ban long ki Beautician.
Ka kong Gloria Gohain Jyrwa kaba dei ka Counselling, Training & Placement, CII MCC, ka la kren bad pynshai halor ki lad kamai bad ki lad ïohkam ïohjam kiba lyngba ka CII MCC, ka la kren ruh halor ka jingeh ha ka ïohkam ïoh jam kaba tang hapoh ka jylla, ka kyntu bad ai mynsiem ïa ki samla ba ki dei ban mih shabar ka jylla ruh ban trei ban ktah lada don ka lad ban kamai.
U Jitumoni Kalita uba dei u CSR Head jong ka Dalmia Bharat Foundation (DBF) u ai mynsiem bad pynshlur ïa ki samla ba kin shim ïa kane ka lad ban shah hikai ha kane ka DIKSHA Beauty Care ha Jaiñtia Eastern College Khliehriat bad ong ba ka long kaba donkam ban kyntiew ïa ka sap ba ki don bad kyntu ïa ki samla ba ki dei ruh ban shim ïa ka kabu ha ka ïohkam ïohjam watla ka dei shabar ka jylla ruh, u la ai ka jingkitbok kitrwiang ïa ki samla kiba la ïoh ïa ka khusnam bad ki syrnot kiba la pyndep ïa ka jingshah hikai na kane ka shlem ai jinghikai bad kyntu ba kin nang ïaid shuh shuh shaphrang ban kynjoh ïa ka thong.
Kiwei pat kiba la ïa don lang ha ka prokram ki kynthup ka kong Idarin Langbnang, kaba dei ka Trainer, CII MCC, u Mobilizer, CII MCC, u bah Eiplanbiang Rymbai, u IR Lead, DCBL, u bah Karlis Rymbai, u Project Officer, CSR, u bah Khambor Rymbai bad la ïoh ruh ïa ka jingkren ai khublei na u Assistant Professor, u Prof. B. Papang,uba dei ruh u Programme Coordinator.