Ai khublei u WS ïa ka VO jong ka shnong Umlynsha ha ka jingrakhe dap shi snem ka VO

Khliehriat, Nohprah 11 : U Waheh Shnong jong ka shnong Umlynsha, u bah Namphrangmi Talang, u ai ka jingkhublei kitbok kitrwiang ïa ka Village Organisation (VO) jng ka shnong Umlynsha ba la tip kum ka Joinlang VO, ha ka jingrakhe dap shi snem ka VO kaba la rakhe myn ha ka 6 tarik mynta u bnai bad ong ba hapoh kane ka VO ki don haduh kumba san tylli ki Self Help Group (SHGs) bad kane ka pynshlur shikatdei eh ïa ki kynthei kiba dei ki samla bad ki long kmie kiba don hapoh shnong ban sdang ban trei ïa ki kam ki jam.
Utei u Waheh Shnong, u la ïathuh ruh ba ka la long ruh ka jingmyntoi bad ïarap shibun eh namar ki longkmie bad ki samla kynthei ki ioh ïa ki jingïarap bad jingkyrshan na ka National Rural Livelihood Mission (NRLM) kaba dei kawei na ki shnat kaba ju pyntrei kam bad pyn tyllun ïa ki project ba la pyllait da ka sorkar pdeng lyngba ka Ministry Of Rural Development (MRD) kaba don ruh ka jingthmu ban ratdiengkhong ïa ka jingduk jingkyrduh ha ka ri bad ki project ba pyntreikam ki long ruh ban kyntiew ïa ka ïoh ka kot jong ki paidbah khamtam kito kiba don jingthmu ban seng la ki kam la jong, kito kiba don sap ban warah jingmyntoi ïa ki ha ka kamai kajih. Na ka liang u Wahehshnong u la kular ba un ïai don ryngkat labg beit bad ka VO ha baroh ki por kumba u la ïa don lang naduh nyngkong ka sngi, u la ai mynsiem bad pynshlur ruh ïa ki dkhot SHG ba kin nang ïai kiew shaphrang ha ki kam ki jingtrei jong ki.
Ka kong Kotlang Ryngkhlem, kaba la ïa don ryngkat lang ha kane ka sngi, ka la pynpaw ka jingsngew kmen halor ka jingdap shi snem kane ka VO, ka la ai mynsiem bad pynshlur ïa ki dkhot ba kin nang kiew shaphrang ha ki kam ki jam ba ki trei , ka la pynshlur ïa ki kynthei ba kin sdang ban seng ïa ki kam ki jam ban seng kam la jong.
Kum ka dak ka jingsngew kmen ka kong K.Ryngkhlem ka la ot ïa u cake kum ka jingrakhe ïa kane ka jingdap shi snem ka VO jong ka shnong Umlynsha, ïa ka prokram la pynïaid da ka kong I.Suchiang.