Ai khublei u John Abraham ïa ki paidbah nong kyrshan ka NorthEast United FC

Shillong, Nailur 01 : U trai jong ka NorthEast United FC u John Abraham u la ai khublei ïa baroh kiba la don bynta lang ha ka jingrah jong ka kynhun ïaka nam lahduh jong ka Durand Cup ha kane ka sngi Saitjaiñ.
Ha ka jingai khublei sha ki nongkyrshan lyngba ki rynsan social media u John Abraham u la ong, “Ngi la jop, kumta ngi ai ka burom ïa baroh ki nongïarap jong ka kynhun, ki coach, ki rangïalehkai bad ïa baroh kiba la don bynta ha ka kynhun ba kan ïoh ban khur ïa ka nam lahduh.
Lah ruh ban kdew hangne ba kane ka dei ka sien kaba nyngkong eh ba ka NorthEast United kan khur ïa ka nam lahduh ha ka lympung Durand Cup hadien ba ka la lah ban pynliem ïa ka kynhun ba khlainbor ka Mohun Bagan Super Giant ha ka final lyngba ka tie breaker.
Shuh shuh u John Abraham u la ong ba u kwah ba ai ka jingkhublei kaba kyrpang ïa ki nongkyrshan kiba la ïai neh ban kyrshan ïa ka kynhun ym tang ha ka por ba ka jop hynrei ha ki por baroh. “To bteng ban kyrshan ïa ka kynhun ym tang ha ka por ba ngi jop hynrei ha ki por baroh,” u la ong.
Ka North East United FC ka la ïoh ruh ban thaw ïa ka rekod kum ka kynhun ba nyngkong eh na ka thaiñ shatei lam mihngi jong ka Ri ban khur ïa ka nam lahduh jong ka Durand Cup da ka jinglah jong ka ban pynliem noh ïa ka Mohun Bagan Super Giant ha ka tie-breaker ha ka jingïakhun kaba itynnad bha kaba long ha Vivekananda Yuba Bharati Krirangan, Kolkata.
Haba phai sha ka jingïakhun dei ka Mohun Bagan kaba ïoh ban pynkhih jar nyngkong lyngba ka penalty ha ka minit kaba 11 jong ka kylla step hadien ba u rangap dien ka NorthEast u la kum pynur ïa u rangïalehkai shakhmat ka Mohun Bagan ha phyllaw kol.
Ym tang katta, ka Mohun Bagan kala ïoh biang ruh ban thep sa shi kol ha ki minit kiba khatduh jong ka kylla step kata ha ka minit kaba 45+5 kaba pynlong ïa ka kynhun ban ïoh lamkhmat haduh 2-0 kol tang ha ka kylla step.
Hynrei dei ynda la poi ka kylla miet ba ka jingïakhun ka la kylla hadien ba ka NorthEast United FC tang hapoh ki lai minit ka la ïoh ban thep ar kol, kata ïa ka kol kaba nyngkong la ïoh thep da u Ajaraie ha ka minit kaba 55 bad ïa ka kol kaba ar pat la ïoh ban thep da u Guillermo ha ka minit kaba 58.
Kumta haduh ban da kut ka por ïalehkai ka jingïakhun ka la neh da ka jingïakhaid haduh ba ki bor pynïaid ki la shim da ka rai ban pynlong noh da ka jingshut tie-breaker.
Kumta dei lyngba ka tie breaker ba ka NEUFC ka laïoh ba pynliem kdur ïa ka Mohun Bagan da 4-3 kol kaba dei ruh ka kynhun kaba la jop bunsien ha ka lympung Durand Cup nalor ba ka dei ruh ka kynhun ba khlainbor ha India.
Da kane ka jingjop, ka NorthEast ka la ïoh ruh ba khur ïa ka song pisa kaba 60lak tyngka katba ka kynhun kaba shah rem ha ka final ka la ïoh ban khur ïa ka song pisa kaba 30 lak tyngka.
Ka NorthEast United FC ka la ïoh ruh ban khur ar tylli ki khusnam shimet, kata lyngba u Gurmeet Singh u ba ïoh ban khur ïa ka khusnam Golden Glove kum u rangap kol ba kynsai tam katba u Jithin MS u la ïoh ïa ka khusnam rangïalehkai ba kynsai tam.
Ïa ka khusnam Golden Boot kaba dei ka khusnam na bynta u rangïalehkai ba ïoh thep bun kol eh la ïoh ban khur da u Noah Sadaoui jong ka Kerala. Kine baroh ki la ïoh ruh ban khur ïa ka song pisa kaba mar 5 lak tyngka.
Kumban shu kdew hangne, ka NorthEast ka don ruh uwei u rangïalehkai Khasi, u Redeem Tlang uba la don bynta bha bad ka kynhun ha ka jingjop jong ka kynthup naduh ka semi final ter ter haduh ka final.