Ai khublei snem thymmai u Bah Clement Shadap ryngkat ka jingangnud ban kyntiew ïa ka Ri Bhoi

Nongpoh, K’lyngkot 06: Kum uwei na u riew rangbah na ka them Ri Bhoi bad uba la don bynta ban synñiang ha kiba bun ki kam jong ka imlang ka sahlang, u Bah Clement Shadap na ka Shnong Umtngam u la ai khublei snem thymmai basuk ba kmen ïa baroh ki paidbah nongshong shnong ka Ri Bhoi bad ki nongshong shnong ka jyll hi baroh kawei.
Kum ban pynkynmaw, u Bah Clement Shadap u dei u MDC barim ka Mawhati bad uba la don bynta ruh ban kyntiew ïa ka jingnang jingstad ha Ri Bhoi District lyngba ka Total Literacy Campaign (TLC) bad ka Post Literacy Programme (PLP), uba la bat ruh kum u District Coordinator ha Ri Bhoi District ha ki snem 1997 bad 1998 bad ba ka Ri Bhoi District ka la kiew ruh haduh 85% ka jingkiew jong ka jingnang jingstad, (Literacy Rate).
Haba ïa kren bad u Mawphor, u Bah Clement Shadap u la ong ba kum u riew rangbah ka them Ri Bhoi u kwah ban ai ka jingkhublei bad ka jingkitbok kitrwiang kaba kyrpang ïa ki paidbah nongshong shnong ka Ri Bhoi bad kumjuh ruh ha ka jylla hi baroh kawei ba une u snem 2026 un long shisha u snem uba dap tang da ka jingkyrkhu suda.
Nalor ka jingai khublei snem tymmai, u Bah Clement Shadap u pynpaw ba u don kata ka jingangnud ba ka Ri Bhoi District kan dang kiew kyrdan ha baroh ki liang bad ban pynlong ïa kane ka District kum kata ka District ka ban dang kiew shakhmat naduh ka jingnang jingstad, ka roi ka par, ki jaka ai jingsumar kiba biang, ki lynti ki synkien bad kiwei kiwei dei bad khamtam ban pynneh ïa ka shongsuk shongsain, namar dei tang lada don ka shongsuk shongsain ngin lah ban kyntiew ïa ka ka imlang ka sahlang ha baroh ki liang.
Haba kren halor ka jingdonkam ban don lang ka jingkitkhlieh ïa ka District bad ka jylla hi baroh kawei, u Bah Clement Shadap u pynpaw ba kum ki nongshong shnong ngi dei ban don kata ka jingkitkhlieh lang ha ka imlang ka sahlang la ki dei ki nongïalam shnong, ki nongïalam niam, ki nongïalam seng bhalang, ki nongmihkhmat paidibah bad wat ka sorkar jylla, namar haba don kata ka jingïatrei lang na baroh ki liang ngin lah shisha ban kyntiew ïa ka imlang ka sahlang ba kan dang kiew shaphrang ha baroh ki liang, u la bynrap.
Shuh shuh, kum u riew rangbah uba la noh ka rta, u pynpaw ruh ba u don shisha kata ka jingangnud kaba khraw ban ïa kyntiew ïa ka ka imlang ka sahlang khamtam ïa ka ri bad ka jaid bynriew ba kan ïa kajuh kyrdan lang kumba long lem kiwei kiwei ki jaid bynriew kiba la kiew shaphrang ha baroh ki liang.