Shillong, Nohprah, 06: Ki nonghikai College ba ïoh jingïarap na ka Sorkar Jylla ha ka Sngi Baar ki la ai khublei ïa ka Ingbishar Meghalaya High Court halor ka rai ban pyndam noh ïa ka hukum ban khanglad ïa ki nonghikai ba kin ïashim bynta ha ka saiñ hima.
Ha ka jingïakren bad ki lad pathai khubor u Bah Brightstarwel Marbaniang uwei na ki nongmudui pyrshah ïa ka rai jong ka Sorkar Meghalaya ha Iingbishar Meghalaya High Court u la ong, “ka sorkar Meghalaya naduh u snem 2018 ka la wanrah ïa ka State Education Policy ban khanglad ïa ki nonghikai ban shim bynta ha ka jylli jong ka saiñpyrthei. Dei ha u snem 2021 ka kynhun Myntri jong ka Sorkar Jylla ka la mynjur ïa ki kyndon (Rules) kiba la la batai shai ba la khang ïa ki nonghikai (Professor) ban shim bynta ha ka saiñpyrthei.”
“Ha u bnai Jylliew 2021, ngi ki 6 ngut ki nonghikai Professor jong ki College ba ïoh jingïarap na ka Sorkar Jylla ngi la ujor ha ka Iingbishar Meghalaya High Court bad dei ha ka 5 tarik mynta u bnai ka Iingbishar ka la pynduh pyndam syndon ïa kane ka jingpynbna (Notification) ba la pynmih hukum jong ka Sorkar” la ong u Bah Brightstar.
U Bah Brightstar u la ïathuh ba ki nonghikai kim banse ban leit ujor sha ka Iingbishar namar na ka liang jong u Symbud Myntri Rangbah ka Jylla u Bah Prestone Tynsong ruh u la kren da kaba shai ba lada ki nonghikai ki sngewthut ïa kane ka jingpynbna lane ka Notification ki lah ban leit ujor sha Iingbishar.
