Ai khublei ka VPP ïa ki paidbah ba kyrshan haduh ban hap pyndem ka sorkar ha ka jingdawa ka jaidbynriew

Shillong, Jylliew 04: Ka Voice of the People Party ha ka sngi u Blei ka ai khublei ïa ki paidbah bad ki dkhot ka jaidbynriew kiba la ai jingkyrshan pura ïa ka jingdawa ban peit biang ïa ka Reservation Policy kaba la pynlong wat ïa ka sorkar ban pyndem ha ka jingdawa bad ban pyndem ha ka jingdawa ban thung da ka Expert Committee.
Ha ka kyrwoh sha ki lad pathai khubor u Nongaiktien ka VPP u Dr Batskhem Myrboh u la ong ba kane ka jinglah ban pynkohnguh ïa ka sorkar ban thung ïa ka Expert Commmittee ka dei ka jingjop jong ka jaidbynriew
“Ka Voice of the People Party ka dap da ka jingkmen bakhraw ïa ka jingjop jong ka jaidbynriew ha ka jingïaleh ban pynkohnguh ïa ka sorkar ban thung ïa ka Expert Committee ban pynkylla ïa ka polisi bhahkam jong ka jylla. Ha kane ka bynta ngi ai ka burom sha u Blei Nongbuh Nongthaw u ba la leh ïa ki kam isynei jong u. Ha kane ka bynta ka Party ka pynpaw ïa ka jingsngewnguh ïa baroh ki ba la don bynta ha kane ka jingïaleh jong ka jaidbynriew Hynniewtrep ba la lam khmat da ka Party,” ong u Dr Batskhem.
“Ngi pynpaw ka jinsngewnguh ïa ki Rangbah nongïalam jong ki kynhun niam/Balang bapher bapher, ki longkmie bad ki khun samla ba ki la wan ban ai ïa ka jingkyrshan bad khamtam ki jingduai ba la ïoh ban pynlong ha ka jaka ba don ka jingshah jingit U Bah Ardent M. Basïawmoit hangtei hajan Additional Secretariat. Ngim lah ruh ban klet bad khlem da pynpaw ka jingsngewnguh ïa baroh ki ba pynlong ïa ki jingduwai na ki iing ki sem jong phi,” ong u Dr Batskhem
Ka VPP ka ai khublei ruh ïa ki Bor Pynïaid District (District Administration) naduh ki officer bad ki wei pat ki nongtrei ba ki la pynthikna ba ka prokram shah jingit ka long kaba ïaid beit ïaid ryntih bad kumjuh ruh ïa ki doctor and ki nurse ki ba la ai ïa ka jingshakri jong ki ban peit pyrman ïa ka koit ka khiah jong u President ka Party.
“Ngi ai ruh ka jingai khublei sha ki kynhun seng (pressure groups), ki seng longkmie bad ki seng samla shnong bad ki wei pat ki kynhun ha ka jylla ki ba la wan ban ai ïa ka jingkyrshan jong ki,” u la ong.
Shuh shuh ka VPP ka ai khublei ba kyrpang ïa kito kiba don ka jinduna ha ki dkhotmet (differently abled persons) kiba don ha kylleng ka Ri Khasi kiba la ai ka jingkyrshan ba sngur jong ki.
“Ka jingkhublei ka leit sha ki paidbah kylleng ka bri u Hynñiewtrep: kynthei, shynrang, samla bad khynnah rit ruh kumjuh ki ba ieh ïa ki kam ki jam jong ki bad ban pynlut la ka bai sngi bad kali ban kyrshan ïa kane ka jingïaleh. Ym tang ba ki wan ban ïa don ryngkat ha ka jaka shah jingit hynrei ba ki la pynlong ruh ïa ki jingïalang bad jingïaid paidbah ha kylleng ki jaka ban pynbor ïa ki MLA jong ki ban kren halor ka mat jong ka polisi bhahkam,” u la ong.
“Ka jingkhublei ruh ba kyrpang ka leit ruh sha ki samla pule ki ba la mih ryntih ban kyrshan ïa kane ka jingïaleh, ngi ai khublei ïa ki dkhot jong ka Party na ki Unit bapher bapher bad ki paidbah ki ba synran ban ap miet ha ka jaka shah jingit. Ka jingaikhublei ba kyrpang ka leit ruh sha ki Volunteers ki ba la pynlut ïa la ka sngi ban pynthikna ba ki ei ki ei baroh kin ïaid beit ïaid ryntih,” u la bynrap.
Shuh shuh ka VPP ka ai khublei kyrpang ïa ki lad pathai khubor kiba la synñang shibun ban ai jingtip bad jingskhari ïa u paidbah ha ka bynta kaba ki don.
“U Blei Un kyrkhu ïa phi i wei pa i wei bad ngin duai ba un ai ïa phi ka met ka ba koit ba khiah bad long bha ka kamai ka kajih,” pynkut ka kyrwoh u Dr. Batskhem Myrboh.