Ai khublei ka VPP ïa ki bor pynïaid distrik ba ki la shah shkor ïa ki samla wad kam

Shillong, Nohprah 04: Ka Seng VPP Mairang bad Mawthadraishan ka pynpaw ka ai khublei bad pynpaw ka jingsngewnguh ïa ki bor pynïaid ka DSC Eastern West Khasi Hills District kiba la shah shkor ïa ka jingkyrpad jong ka Party bad khamtam eh jong ki Samla aplai kam jong ka Eastern West Khasi Hills ban pynkynriah ïa ka tarik long eksam DSC na ka bynta ka Post LDA ba la buh ban pynlong ha ka 14 tarik u Nohprah 2024. Kane ka tarik ka ïatyngkhuh bad ka sngi ba pynlong eksam ka MPSC.
Ka Seng hadien ba ka la ïoh ïa ka jingud bad jingkyrpad ki Samla ka la leit ai da ka jingthoh sha ka DC kaba long ruh ka Chairman jong ka DSC, ban pynkynriah noh ïa ka eksam DSC khnang ban ailad ïa ki Samla ban ïoh ïaleh ïa ka eksam MPSC.
Ka Seng ha ka jingïalam u Bah John Basaïawmoit, Organising Secretary ka VPP Mairang bad Bah Powell Sohkhlet, Organising Secretary ka VPP Mawthadraishan ryngkat kiwei pat ki dkhot jong ka Party, ha ka 28 tarik u Naiwieng 2024 ki la leit ïakynduh ïa ka DC. Hynrei namar ba kam don la ai noh ïa ka shithi bad ïakynduh ruh ïa u Member Secretary ka DSC ryngkat bad ka jingkyrpad ban pynkynriah noh ïa ka tarik eksam DSC Eastern West Khasi.
Ka Seng ka ai khublei sa shisien ïa ki bor pynïaid ka DSC Eastern West Khasi bad kane kan ailad ïa ki Samla aplai kam ba kin ïoh lad ban ïaleh baroh 2 tylli ki eksam.
Ha kajuh ka por ka Seng haba kitbok kitrwiang ïa baroh ki ban ïaleh eksam, ka kyntu ruh ïa ki bor pynïaid jong ka DSC ban leh hok bad peit ba ki samla kiba pass ïa ka eksam katkum ka merit kidei ban ïoh ïa ka kam.
Ka Seng ka maham ruh ïa ki bym don bynta bad ka eksam ne kiba don ha ka bor synshar ban tuklar ïa kane ka eksam, ong ka kyrwoh ba la phah da u Bah John Basaïawmoit organising secretary ka VPP bad Bah Powell Sohkhlet.