Shillong, Jylliew: Ka Seng Samla Mawlai Pyllun (SSMP) ha u kyrwoh lyngba u Bah P. Nongbet, Academic Secretary, ka ai ka jingkhublei ïa baroh ki khun samla ka shnong Mawlai bad kumjuh ruh ïa baroh ki khun samla ka bri u hynñiewtrep halor ka jingïoh kheit ïa u soh ka jingtreishitom lyngba ka jingjop ha ka jingpynbna ïa ka result SSLC, 2022 bad HSSLC, 2022.
Ka Seng ka la ong ruh ba wat la ka khlam Covid-19 ka la ktah jur ha ki ba bun rukom khamtam ha ka pule puthi, hynrei baroh ki khun samla ki la ïai dem minot thop ban trei shitom bad kane ka result ka pyni shai ba ngim dei ki ba duna ha ba ka mynsiem jingïaleh ban poi sha ka thong ka ba bha ka don ha ngi uwei pa uwei.
Nalor kata ka la ong ruh ba kito ki bym shim poi sha ka thong mynta ka kynti ruh kim dei ban duh mynsiem hynrei ki dei ban kut jingmut bad ïai ïaleh ban pyndep ïa ka thong. Ka jingai mynsiem shuh shuh ïa baroh ki khun samla ka ri, ba ngin nang ïai trei shitom ban poi sha ka kyrdan jong ka nam da ka ba ngi long ki nuksa ïa ki longdien mandien bad ruh da ka ba husiar bad kiar na ki jingkyrni bym tei, hynrei ban don ka nongrim ka ba skhem namar ki khun samla ki long ka lawei bad ka lawei kam shong lashai, hynrei ha ngi noh hi mynta.
