Nongpoh, K’Lyngkot 31: Ka Nongpoh Region Auto Owners and Drivers Association (NRAO&DA) ka la pynpaw ka jingsngewnguh bad ai khublei kyrpang ïa ka ophis u Deputy Commissioner ka Ri-Bhoi District ryngkat kiwei ki tnad sorkar bapher bapher ba kynthup ïa ka ophis u DTO, DRDA, DSWO, DMHO, DLC & DLDM hadien ba ki nongñiah auto ki la ïoh jingsumar ei lyngba ka ‘One Day Camp on Schemes cum Free Medical Checkup for Auto Drivers’ bala pynlong ha phyllaw jong ka ophis u District Transport Officer ha Nongpoh.
Na ka liang ki nongïalam ka NRAO&DA ba kynthup ïa u Bah Banassar Lyngdoh President, Bah Ellenvai Tynsong Education Secretary, Ka long ruh ka jingkyrkhu kaba khraw ïa ki nongñiah Auto ka thaiñ Nongpoh kynthup ruh kiba na Nongsder bad Umran kiba la leit ban shim bynta ha katei ka jingsumar ei kaba lada leit haki hospital ki hap ban siew hynrei lyngba katei ka jingshimkhia na ka ophis u DC ki nongñiah auto haduh kiba shong dukan hajan DTO ki la ïoh ka kabu ban phah sumar ei.
Ki la pyntip ruh ba ha katei ka prokram ai jingsumar ei ki nongñiah auto kiba la poi ki la jan kot sha ka 300 ngut bad nalor ka jingsumar ei ki la ïoh ruh ka jingtip halor ki jait Insurance bapher bapher kum ka PMJJBY, SBI, Atal Pension Yojana bad kiwei kiwei.
