Khliehriat, Nailur, 15: Ka Jaiñtia National Council Khliehriat Circle (JNC-KC) lyngba u kyrwoh ba la phah da u General Secretary, u Samla Symboh Sumer, ka pynpaw ka jingsngewnguh kaba khraw ïaka iing treikam ki Deputy Commissioner ka East Jaiñtia hills District, khamtam ka ADC, ka kong J.U.Kharpuri,MCS kaba la shimkhia bad pynurlong ïa ka jingkyrpad ka seng ban leh da ka screening live show (DIPR Large Screen) ban pyni paidbah ïa ka show jong uwei naki samla ka bri u Hynñiewtrep, u Steve Jyrwa uba shim bynta ha ka India best dancer season 4.
Utei u samla don sap, u Steve Jyrwa mynta u la poi sha ka kyrdan Top 6 bad ka seng ka ai ka jingkitbok kitrwiang ba un dang lah ban poi shuh shuh sha khmat bad poi sha ka thong.
“Ka seng myn ha ka 12 tarik u nailur 2024 ka la leit ban ïakynduh markhmat bad ka ADC, ka kong J.U.Kharpiri bad ai ruh da ka jingthoh ha kaba la kyrpad ban leh da ka screening live show ha ka DIPR Large Screen kaba Don hapoh phyllaw jong ka ophis u Deputy Commissioner ha Khliehriat ba ki paidbah kin ïoh peit ïa ka show jong u samla Steve Jyrwa bad kane ka jingkyrpad jong ka seng ka la urlong”
Kumta ka seng JNC Khliehriat Circle ka ai ka jing khublei ïa ka kong Kharpuri, ADC East Jaiñtia Hills District kaba la leh shitom ban pynurlong ïa katei ka kam, ka seng ka ong ruh ba ka jingpyni ïa katei ka prokram da ka screen ba heh kam dei ban tang pyni sngewbha ne tamasa, hynrei kan long ruh kum shibynta ban ai mynsiem bad pynshlur ïa kiwei kiwei ki samla kiba don ka sap ka phong ba kin mih shakhmat ha ki rynsan bapher bapher.
“ Na ka liang ka seng ka khot bad wer ïa phi ki paidbah jong ka thaiñ ba phin sngewbha ban wan peit ïa kane ka show ha man ka por ba pyni paidbah kata naduh kane ka taïew, ka Sngi saitjaiñ bad Sngi u Blei haka por 8 baje mynmiet ka ban long kum ka dak ban kyrshan ïa u samla Steve Jyrwa kumjuh ruh ban tip bniah ba kumno ban ai ïa ki vote jong phi na ka bynta jong u Steve Jyrwa lyngba ki mobile phone ki jong phi khnang ba un poi sha ka thong bad un wanrah ruh ïa ka nam ka burom ïa ka bri u Hynñiewtrep bad ia ka jylla hi baroh kawei” pynkut u kyrwoh ka seng.
