Shillong, Jylliew, 20: Ka Fraternity Art Cine Entertainment Shillong (FACES) ka ai khublei kaba khraw ïa u Bah Armstrong Pame, Director of Films Division, Ministry of Information and Broadcasting, na ka bynta ki lad kiba u la ai sha ki 5 ngut ki nongshna phlim napoh ka jylla Meghlaya.
Kine ki nongshna phlim ka jylla ki dei ka kong Ekratia Khongtiang, Emidao Shylla,
Shawn Gabrielle Kharphuli, Sankirang L Khongwir, Nekison Jordan Jyrwa.
Ka jingïashim bynta jong ki ha ka 18th Mumbai International Film Festival, kaba la long ha Mumbai, ka la pyni ïa ka jingïaid lynti jong ki mamwer ha ki kam jong ki bad ka jingkiew ki karkhana pynmih phlim ha kane ka jylla.
Ka FACES ka ai khublei ïa u Vijay Mantri, Commissioner and Secretary, IPR, ka sorkar jylla Meghalaya, halor ki jingkyrshan ba khlem kut ka jong u ïa kane ka kam shna phlim. Ka jingïoh ban leit shim bynta kine kiba shna phlim ha kane ka Tamasa kaba pawnam ka la ai lad bad ïarap ïa ki ban ïohi ïa ka jingdonkam jong ki film festival bad ka bynta ha ki kam shna phlim.
Kane ka jingïoh mad jong ki ym tang ba kin pynïar ïa ki sawdong kane ka kam hynrei ki la ïoh ruh ban pynlong kongsan ïa kane ka kam shna phlim ha Meghalaya. Ka FACES ka la ong ba ka don ka jingkyrmen ïa ka sorkar jylla ba kan ïaibteng ban kyntiew ïa kine ki jingsdang, ban ailad ïa kiba shna phlim ka lad ban ïadonbynta ban tip napoh ka ri bad shabar ka ri ha kaba ïadei ba ki kam pynmih phlim.
“Katba ki dang peit shakhmat ban kyntiew khambun kiba don sap, ngi don ka jingshaniah bad kine kiba la ïoh mad ha kane ka tamasa kin ai mynsiem bad kyntiew shaphrang ïa ka kam pynmih phlim hapoh ka jylla jong ngi. Ngi ai khublei sngewbha ïa ki jingkyrshan ba khlem sangeh na baroh ki riew paidbah ban pynthikna ïa ka jingïaineh kane ka kam bad ka jingithuh ïa ki nongshna phlim ka Meghalaya ha ka rynsan kaba khamheh,” ong ka FACES.
Ïa ka Fraternity Art Cine Entertainment, Shillong (FACES) la thaw da ka jingthmu ban kyntiew bad kyrshan ïa kiba don sap ha ki karkhna pynmih phlim da kaba ai ka rynsan bad ki lad na ka bynta ki nongshna phlim napoh ka jylla ba kin lah ban pyni ïa la ki kam ba tbit bad ban ïoh ki lad ban pynpaw sha ka pyrthei. Ka FACES ka la pynlong ïa ka Kelvin Cinema Festival jong ka 1st edition ha u snem 2019 bad ka 2nd Edition ha u snem 2023.
La thaw ïa ka FACES ha u snem 2018, ki dkhot ki don 23 ngut, ki Committee Member ki dei President- Simi Khongtiang, Pradip Kurbah-Organising Secretary, Dominic M Sangma- General Secretary, Gordon Kharsyiemïong-Treasurer, Vice President- Julius L Basaïawmoit.
