Shillong, Jylliew 06: U President ka Bharatiya Janata Party (BJP) Meghalaya bah Ernest Mawrie hynne ka sngi Nyngkong, ula ai khublei ïa ka sorkar jylla halor ka jingshimkhia ban sdang noh ïa ka jingïakren ïasuk bad ka seng kiengatiar ka Hynniewtrep National Liberation Council (HNLC).
Haba kren sha ki lad pathai khubor u bah Ernest ula ai ruh ka jingïaroh ïa ka sorkar pdeng bad ula ong ba kane ka dei namar ka jingshimkhia hi da u Myntri Rangbah duh ka ri India u Narendra Modi naka bynta ban wanrah ïa ki kam pynroi ha baroh ka thaiñ shathei lam mihngi (North East) daka ba pynduh ïa ki sengkieng atiar.
“Man ka por u Myntri Rangbahduh ka ri India Narendra Modi u ju ïai ong ba ki kam pynroi hapoh ka jylla bad ka thaiñ Shathei Lam mihngi (North East) kan wan lyngba ka jingpynduh jait ïa ki kam pyntriem bad ka jingpynduh ïa ki jingïakajia hapdeng ki jylla” ong u bah Ernest.
U bah Ernest ula ong ba kum ka Party ka kwah ban ïohi ba ka jylla kan kiew ha baroh ki liang bad kine baroh kin urlong lada ka shong suk shong shngaiñ ka neh hapoh ka jylla bad ka thain shathei lam mihngi baroh kawei.
“Ka BJP kaba don lang haka sorkar MDA, ka ai khublei ïa ka sorkar kaba lah ban shimkhia ban poi noh shaka jingïakren ïasuk kaba pura bad ka HNLC naka bynta ban ïai pynneh ïa ka shong suk shong shngaiñ hapoh ka jylla” ula ong.
Ula ong ba ka BJP ka kit bot kit rwaing ïa ka sorkar jylla bad ka kyrmen ba shen ki paidbah ka jylla kin sa ioh sngew khubor ba bha halor kane ka lynti ban poi noh shaka jingïakren ïasuk hapdeng ka sorkar jylla, ka HNLC bad ka sorkar pdeng.
