Jowai, Naitung 12: Ka All Hynñiewtrep People United Front (AHPUF) ka ai Khublei Behdeiñkhlam ïaki khun ki hajar ka Seiñraij Jowai khamtam eh ïaki khun ka Ñiamtre kiba dangbat ïaka ñiam tynrai bad kumjuh ïaki khun ka Ri-Lum Jaiñtia hi baroh kawei.
Ka Behdeiñkhlam ka kynthup lang ïaka ñiam bad ka culture jong ki Pnar, haka jingïadei bad ka ñiam, ki khun ki hajar jong ka Ñiamtre ki la pyndep ïaka kñia ka khriam, ka nguh ka dem ka suit ka shor ïa U Blei Trai Kynrad Nongbuh Nongthaw hala ka jong ka jingngeit bad ka rukom mane, haka jingïadei bad ka Culture pat ki la pyndep ïaka put ka tem ka shad ka rwai ha ryngkat bad ki riam tynrai kaba i shongkun shong khia ban pyni shaka pyrthei ïaka jingriewspah jong ka Riti ka Dustur jong ki Khasi Jaiñtia.
Ngi juh ïoh sngew ïaki kyntien shong sbai naki riew Rangbah jong ka Niamtre baki shait ong, “Maïa ïei ïong I de. Burom ïei ïong kiwi”. Kane ka long ka jingsneng ba ngin nang bad ieit ïala ka jong kaba long ka Riti ka Dustur jong ngi bad ban burom ïaka jong kiwei kaba mut ka ñiam ka rukom ne ka jingngeit jong ki. Namar ba ka jait bynriew ka don shibun ki ñiam had ki jingngeit bad ki rukom’ mane. Kumta lada ngim nang ban burom ïaka jingngeit jong kiwei te ka lah ban wanrah ïaka jingïapait ïapra haka ri bad ka jaitbynriew, ong ka seng lyngba u ma J. Phawa President bad u Secretary ma C. Sungoh.
Na ka liang ka Hynñiewtrei Youth Council (HYC) Jaiñtia Hills District lyngba u Organising Secretary samla P. Suna ka ai khublei Behdieñkhlam basuk ba kmen ïa ki khun ka Seiñ raij Jowai, kyrmen ba ka jingpyndep ïa ka Behdieñkhlam kan wan rah ïa ka bha ka miat, ka suk ka kmen bad ka roi ka par ha baroh ki liang.
