Jowai, Naitung 19: Ka Sengkhihlang ka ai khublei lehñiam Behdeinkhlam basuk ba kmen ïa baroh ki khun jong ka Seiñ Raij Tuber kiba shong ba sah ha kylleng ka bri u hynñiewtrep hynñiew skum to ai ba kane ka jingleh Niam ïa ka Behdeiñkhlam ka ban sdang naduh ka 19/07/2022 bad kut ha ka 22/07/2022 ha ka syiem aitnar jong ka Seiñ Raij Tuber kan long ka jingleh Niam kaba phuh ba phieng bad kaba shongkun shong Blei.
Ka Behdeiñkhlam jong ka Seiñ Raij Tuber kadei ka Behdeiñkhlam kaba heh tam hapoh ka Ri lum Jaiñtia bad kumjuh ha ka State Meghalaya ha kane ka Lehniam Behdeiñkhlam ki khun jong ka Seiñ Raij Tuber naduh na West Jaiñtia bad East Jaiñtia Hills kin wan ban ïashim bynta ha kane ka jingleh Niam kaba shi sien shi snem.
Ka Sengkhihlang ka khmih lynti ba kane ka jingleh Niam ïa ka Behdeiñkhlam kan long kaba heh bad kaba phuh ba phieng namar ha kine ki ar snem ba la dep ka jingleh Niam ïa ka Behdeiñkhlam ka long kaba kynjah namar ka jingdon jong ka Khlam COVID 19.
Hynrei mynta u snem kane ka khlam COVID-19 ka la jah shi syndon te lyngba kane kane ka jingleh Niam ïa ka Behdeiñkhlam ba u Blei Trai kynrad un theh shuh shuh ia ki jingkyrkhu kyrdoh ïa baroh ki khun jong ka Sein Raij Tuber ba u Blei un beh krat ia ka khlam ka ngoh ka pang ka shitom khnang ba ha kine ki ‘Saw Sngi Lai Miet’ ba ki Blei kin wan peit wan sylli ïa ka ïing ka sem jong iwei pa iwei ki khun jong ka Seiñ Raij Tuber ha ryngkat bad ki jingkyrkhu kyrdoh. Kane ka long katkum ka jingpyllait khubor na u Rgh, S. Sari Publicity Secretary Sengkhihlang.