Ai khublei Behdeiñkhlam ka KSU bad JSU ha ki khun ki hajar ka ri Jaiñtia
Shillong, Naitung 01: Ka seng JSU Shillong, baroh kawei naduh ka sengkmie ha ryngkat lang bad shnat treikam jong ka baroh ki Circle bad ki Unit ka ai khublei kyrpang bad ka kitbok kitrwiang ïa baroh ki khun ki hajar jong ka ri Jaiñtia khamtam ïa ki khon ka Seiñ Raij Niamtre ki ban sa pyndep ïa ka lehniam Behdieñkhlam jong ki ha une u snem 2024.
Ka seng ka phah ruh ïa khubor sha baroh ba kane ka jinglehniam Behdieñkhlam kaba mynta kan warah shisha ïa ka jingkyrkhu kyrdoh na u Trai Kynrad khnang ba baroh kin ïoh ïa ka shait ka khiah kaba bha bad ban bha ka kajih ka kamai bad ka pule puthi ban ïoh ruh ka jingshong suk ha baroh ki liang hapoh ka imlang ka sahlang.
Na ka liang jong ka JSU ha ka kyrwoh ba la phah ka ai ka jingai khublei sha baroh ïa ka Behdieñkhlam ba suk ba kmen ïa baroh, kane ka long katkum ka kyrwoh kaba la phah da u samla Livingson Sama u Art and Culture secretary ka seng JSU sengkmie.
Ha kawei pat ka liang ka Khasi Students Union West Jaiñtia Hills District Unit (KSU-WJHDU), ka shim ïa kane ka kabu ban ai
khublei Behdieñkhlam basuk ba kmen ïa baroh ki khun Niamtre jong ka Seiñraij Jowai.
“To ai ba kane ka Behdieñkhlam ka long mynta u snem kan long kaba ïaid beit ïaid ryntih bad kan beh ïa ka jingpang kiba bapher bapher jong kane ka pyrthei khamtam ha kaba ngi lah ban beh ïa ki jingpang khlam ba har rukom. Ngi ngeit skhem ruh lyngba kane ka Behdieñkhlam kan tehsong ïa ka jaitbynriew ban don ka mynsiem ïatylli kum ka jaitbynriew rit pait hapoh ka Bri u Hynñiewtrep Hynñiewskum”.
Ka seng ka kitbok kitrwiang kyrpang ïa ki khun jong ki Seiñraij bapher bapher hapoh Rilum Jaiñtia ba kin dang lah ban dang ïaid
shakhmat ban pynneh pynsah ïa ka lehniam ka leh rukom bad ka Riti dustur kan im bad ka jaidbynriew kan neh kan sah ha sla pyrthei
To ai ba U Blei u Trai kynrad Nongbuh Nongthaw lyngba ka nguh ka dem ka duwai ka phirat un dang theh ïa ki jingkyrkhu
khyrdoh ban dang ïoh ïa ka koit ka khiah krad ban lah ban kamai bha bad ban kiew irat ha ka pule puthi ka pyrkhat pyrdaiñ ka ban kyntiew ïa ka Ri bad ka Jaitbynriew.