Ai ka sorkar pdeng 2,070 klur tyngka na ka skhim ‘Pride of Hills’ sha ka Meghalaya, ai khublei u Myntri Rangbah

Shillong, Lber 29 : Ka Meghalaya kan ïoh 2,070 klur tyngka hapoh ka skhim ba wanrah thymmai ka Sorkar Pdeng ba ai kyrteng “Pride of Hills”-na ka bynta u snem 2026-27, da ka jingthmu ban pynsted ïa ki kam pynroi ha ki Jylla ri lum kiba mad ïa ki jingeh na ka rukom long ki jaka.
U Myntri Rangbah ka Jylla Conrad K Sangma ula pynpaw ïa ka jingsngewnguh ïa u Myntri Rangbah Duh ka Ri Narendra Modi bad ka Myntri Pla tyngka Nirmala Sitharaman halor ka jingpyllait ïa kane ka skhim hapoh ka Special Assistance to States for Capital Investment (SASCI).
Haba thoh ha Social Media, u Conrad ula ong ba ka jingpynmih ïa ka skhim “Pride of Hills” ka dei ka “jingithuh ba kyrpang ïa ki jingeh kiba phylla” ba la mad da ki Jylla ri lum kum ka Meghalaya, haba pyntip ïa ki kam pynroi ki ban wanrah jingkylla, kiba dang ïaid mynta ha ka thaiñ.
Ka skhim kaba la mang baroh lang haduh 25,000 klur, tyngka ka dei kaba thmu na ka bynta ki Jylla kiba don ïa ki jaka kiba eh, ka jingduna ki paid nongshong shnong bad jingduna ka jingpynmih pisa ki daw kiba ju lam sha ka jingtlot ka pla tyngka bad ka jingjur ka jingshah na ki jingphah pisa ka Sorkar Pdeng.
Kat kum ki kot ki sla, ka song pisa ka dei kaba thmu ban pynkhlaiñ ïa ka jingpynlut pisa ha ki jingtei bad kyrshan ïa ki Jylla ha ka ban lah siew ïa ki jingsiew ba hap ban leh kum ka tulop, ka bai bam tynmen, ka jingsiew sut, haba pynkhlaiñ ruh ïa ki project jingtei bad kam pynroi.
Napdeng ki nongioh jingmyntoi, ka Arunachal Pradesh ka la ïoh heh duh ïa ka song kaba kot haduh 4,900 klur, tyngka bud sa ka Himachal Pradesh-3,920 klur, tyngka Nagaland- 3,880 klur tyngka, Meghalaya 2,070 klur tyngka.
Ki Heh Sorkar ki ong ba ka jingnang ai shuh shuh ïa ka bhah nalor ka kyndon ka SASCI, ka lah ban nang pynkhlaiñ ïa ka jingmyntoi ïa ki jingtei bad ka jingkiew ka ïoh ka kot ha ki Jylla rilum kynthup ka Meghalaya.