Shillong, Naitung 19 : Ka ïing bishar High Court jongka jylla ha ka Sngi Ba Ar ka la bthah ïa ka sorkar jylla ba kan ai ka jubab hakhmat ka ïing bishar halor ka jingwan kit bad lum thup ïa u dewiong ha Gasuapara Garo Hills ban tip naei une u dewiong u mih ne wan.
Ha ka hukum jong ka ïing bishar ba la shong bishar da ki arngut ki nongbishar la pynpaw ba ïa kane ka mukotduma yn sa shong bishar biang hadien ka 10 sngi bad kumta ïa ka jubab dei ban pynpoi hapoh kine ki sngi. Ka jubab ka dei ban shai nangno une u dewiong u mih ne wan ïa uba la lum thup ha Gasuapara, South Garo Hills bad lada u dei uba wan na shabar dei ban pyni ïa ki jingthoh ha ka jaka ba u rung sha ka jylla bad dei ruh ban pynshisha nangno la wan kit ïa une u dewiong.
Kane ka hukum ka long halor ka mukotduma PIL ba la ujor da u Champer M Sangma pyrshah ïaka sorkar.
Kat kumu nongujor ula kynnoh ba ïa ki kot ki sla lah ban shon tuh da ka jylla ban ïoh shallan ïa une u dewiong ïa uba la thied na Assam sha Bangladesh.
Ka ïing bishar kan shongbishar biang halor kane ka mukotduma ha ka 2 tarik Nailar 2022.
