Ai jingtip ka NHDC ïa ki nongthaiñ jaiñ haka thaiñ Umden halor ki skhim sorkar bapher bapher

Nongpoh, Jylliew 13: Ka National Handloom Development Corporation Limited (NHDC) haka sngi thohdieng kala lum ïaki nongthaiñ jaiñ haka thaiñ Umden ban pynlong da ka seminar ban ai jinghikai bad pyntip halor ki jingmyntoi bad ki skhim bapher bapher ba ki lah ban ioh naka sorkar lyngba ka Ministry of Textiles, kaba la pynlong ha DUYA Auditorium, Diwon.
Ha katei ka prokram kumba 150 ngut ki nongthaiñ jaiñ kila wan ban ïa shim bynta naka bynta ban ioh jingtip halor ki jingmyntoi bad ki skhim sorkar bapher bapher ba kum ki nongthaiñ jaiñ ki dei ban ioh jingmyntoi naka sorkar kumba ka thaiñ Umden kadei kawei naki jaka ba paw haka dong Ri-Bhoi halor ki kam thaiñ jaiñ.
Haba kren ha katei ka sngi naka liang u Nilesh Sukhadeve u ba dei u Senior Manager (Commercial) ka NHDC Ltd. U la pynshai ba ki nongthaaiñ jaiñ ba ki lah ban ioh ïaki skhim naduh ka bai leit bai wan, ki jingkyshan pisa naka sorkar, ha kaba ïadei bad ka jingpynmih ïaki jait ksai ba ki lah ban ioh lyngba ki Yarn Passbook.
U la ai mynsiem ruh ïaki nongthaiñ kumba ka Ri Bhoi District ka dei kawei naki district kaba paw halor ka jingpynmih ïaki ksai ryndia bad ki kam thaiñ jaiñ, ba kim dei ban shu kut tang shi jaka hynrei ban thaw ki lad ki lynti ban pynpaw pyrthei ïaki haka ri bad wat shabar ri ban kyntiew ïaka kam thaiñ jaiñ bad kumjuh ruh ka ioh ka kot, da kaba kyntu ruh ïaki khun samla bad ki longkmie ba ki dei ban pynleit jingmut ha katei ka kam kum ki nongseng kam da ka jingïarap jong ka sorkar kum ka RMSS Scheme, bad kiwei kiwei.
U Bah Sterling Khymdeit Secretary ka shnong Diwon, u la ong ba ka kam thaiñ jaiñ bad ban sengkam lajong ka long kaba kongsan ha kine ki sngi kyrduh kam kyrduh jam, bad kum ki longkmie kiba ju smat ban pynleit jingmut haka kam thaiñ ban long kum ki nongprat lynti naka bynta ki khun samla ban pynneh pynsah ruh ïaka thaiñ ka wet, da kaba pyndonkam ruh ïaki lad jingmyntoi ba ioh naka sorkar bad kane hi kan kyntiew ïaka ioh ka kot bad ka kam thaiñ jaiñ.
Naka liang u Bah Precious Tmung u ba dei u President jong ka Meghalaya Ryndia Producers Association bad u ba long trai ruh ïaka Zong-hi-I kawei naki kynhun kaba pynmih ïaki jaiñ ryndia haki rukom thaiñ katkum ka juk ba mynta u la ong ba ki nongthaiñ ki lah ban ioh jingmyntoi shibun naka sorkar lyngba ka Ministry of Textiles bad Handloom, da kaba kyntu ruh ïaki nongthaiñ ha katei ka sngi ba ki dei ban shim kabu ban wad jingïarap naka sorkar naka bynta ka jingkyrshan badka jingmyntoi ban kyntiew ïaka kam thaiñ jaiñ ha ka don bad ka thaiñ baroh kawei.