Ai jingtip ka EPFO ïa ki jaka treikam halor ka skhim Employment Linked Incentive ba thymmai

By Mawphor Editor On Jul 15, 2025

Shillong, Naitung 14: Ka Employees’ Provident Fund Organisation (EPFO), Regional Office Shillong, ka la pynlong ïa ka jingïalang bad ki nongaikam ha ka thaiñ ban pynsaphriang ïa ki jingtip halor ka skhim Employment Linked Incentive (ELI) ba la mynjur thymmai ha ka sienjam ban kyntiew ïa ka jingïoh kam bad kyntiew ïa ka jingshngaiñ ha ka imlang sahlang ha ka thaiñ.
Kum shi bynta jong ka jingïakren ba ïar bad ki sienjam ai jingtip, ïa ka jingïakren la ïalam da ki ophisar jong ka EPFO RO Shillong, kiba la ai jingtip ïa ki nongmihkhmat na ki lai tylli ki jaka treikam ba pawkhmat. Kiba la ïadonlang ki kynthup ïa ka Nikita Sunar, HR Executive jong ka Hotel Centre Point Group Enterprises; u Ranjan Purkayastha, Senior Accountant jong ka M/s CMJ Breweries Pvt Ltd; ka Evangelene, PF/ESIC Administrator jong ka Shishupal Security Consultancy and Services bad ka Kong Majaw, kaba mihkhmat ïa ki nongshim bynta ha ka thaiñ.
Ka jingïakren ka la long kum ka rynsan ai jingtip ha kaba la ïakren sani ïa ki kyndon, ki jingmyntoi, ki jingdonkam ban ïoh bynta, bad ki rukom aplai hapoh ka Skhim ELI. Ki ophisar sorkar ki la jubab ruh ïa ki jingkylli ba la buh da ki nongmihkhmat bad ki la pynshlur ïa ki ban pynphriang jingtip hapoh la ki jong ki jong ki seng.
Haba kren ha kane ka sngi, u K Hungyo, Regional PF Commissioner II, EPFO RO, bad ki ophisar na ka EPFO Shillong ki la ban jur ba ka skhim ELI kam dei tang ba ka pynshlur ban pynmih kam hynrei ka pynkhlaiñ ruh ïa ka jingthmu jong ka India na ka bynta ka roi ka par kaba kynthup lang bad ban pynskhem ïa ki nongtrei. Lyngba ka jingïada ha ka imlang sahlang ka long ka nongrim ba kongsan na ka bynta ka roi ka par kaba ïaineh, la khmih lynti ba kane ka skhim kan pynshlur ïa ki nongai kam ban pynrung kyrteng hapoh ka EPF Act bad ban ai ïa ki jingmyntoi kiba jrong samoi ïa ki nongtrei jong ki, kum ka provident fund, ka bai bam tymmen, bad ka insurance.
Ha ka jingïakren, u Ranjan Purkayastha u la ong, “Ka skhim ELI ka dei ka sienjam ba la pyrkhat bha, bad lada pyntreikam ha ka jingïatreilang, kan ai jingmyntoi shibun ïa ki nongtrei.” Ka Nikita Sunar u la ong, “Ngi la wanrah ïa ka skhim kaba bha kaba la saiñdur khnang ban long kaba myntoi ïa ki nongai kam bad ki nongtrei. Kan ïarap ban pynmih bun ki kam, kaba long kaba kongsan bha haba ka jingbym donkam ka dei ka jingeh kaba nang kiew. Kaba ar, ka rukom treikam ka long kaba suk namar ïa ka pisa ai jingkyrshan yn phah beit beit sha u nongtrei, bad ki nongai kam ruh kin ïoh ïa ka jingkyrshan pisa. Da kaba ïasam ïa ki juh ki jingmut, ka Kong Majaw ka la bynrap, “Kane ka skhim ka dei ka sienjam kaba bha ban pynskhem ïa ki nongtrei, khamtam eh na ka bynta ki samla kiba rung ha ka kam ha ka sien kaba nyngkong. Nga ngeit kan ailad ïa kiba bun ki samla ban ïoh ïa ki jingmyntoi kiba lah ban kyrshan ïa ka jingshngaiñ jong ki kaba jrong samoi.
Kane ka sienjam ka la long shi bynta jong ka jingpynsngewthuh paidbah shaphang ka skhim ELI kaba dang ïaid shakhmat, kaba thmu ban pynshlur ïa ki nongai kam ban shim kabu ïa ki jingai jingmyntoi bad ban noh synñiang sha ka jingkiew ka jingïohkam ha ka thaiñ. La pynshai ruh ïa kiwei pat ki seng pathai khubor ha ka thaiñ shaphang ki jingthmu jong ka skhim, ki kyndon ban ïoh ïa ka skhim, bad ka rukom pyntreikam.
Ka Kynhun Myntri jong ka sorkar pdeng ba la pynïaid da u Myntri Rangbah duh ka ri, u Narendra Modi, ka la mynjur ïa ka skhim Employment Linked Incentive (ELI) ban kyrshan ïa ka jingïoh kam ïoh jam, ban kyntiew ïa ka jinglah ban ïoh kam bad ka jingshngaiñ ha ka imlang sahlang ha baroh ki bynta, da kaba pynleit jingmut kyrpang ïa ka tnad shna tiar. Hapoh ka Skhim, katba ki nongtrei ba dang trei nyngkong kin ïoh ïa ka tulop kaba shi bnai (haduh T.15,000/-), ki nongai kam kin ïoh ïa ki jingmyntoi haduh ar snem na ka bynta ban pynmih kam shuh shuh, ryngkat bad ki jingmyntoi na ka bynta sa ar snem na ka bynta ka kam shna tiar. Ïa ka skhim ELI la pynbna ha ka mang tyngka jong ka sorkar pdeng 2024-25 kum shi bynta jong ka PM’s package kaba don san tylli ki skhim ban pynsuk ïa ka ïoh kam ïoh jam, ka jingkyntiew ïa ki sap treikam bad kiwei kiwei ki lad ki lynti na ka bynta 4.1 Klur ngut ki samla ha kaba ka mang tyngka baroh ka long T. 2 Lak Klur.
Da ka jingpynlut kaba T.99,446 Klur, ka skhim ELI ka thmu ban ai jingmyntoi ban thaw palat 3.5 Klur ki lad ïoh kam ha ka ri ha ka samoi kaba 2 snem. Na kine, 1.92 Klur ngut ki nongïoh jingmyntoi kin dei ki nongïoh jingmyntoi ba nyngkong, kiba rung ha ka kam. Ki jingmyntoi jong ka Skhim kin treikam na ka bynta ki kam ba la thaw hapdeng ka 01 tarik Nailar 2025 bad 31 tarik Naitung, 2027.