Tura, Jylliew, 01: Ka Womens’ Trading Organisation (WTO), Tura ka la ai da ka jingthoh sha u Chief Executive Member (CEM) ka GHADC u Albinius Marak halor ka Trading Licence bad Provisional Tax bad kiwei kiwei ha kaba ïadei bad ka khaïi pateng ha ri lum Garo.
Ha katei ka jingthoh ba la soi da ka Monikha D Momin, President ka WTO, la pynpaw ba ki longkmie ha ri lum Garo kiba im na ka kam khaïi ki ïakynduh bun ki jingeh ha ka khaïi pateng jongki namar ka jingpynslem jongka GHADC ban ai ïa ka Trading Licence ïa ki longkmie.
La ïathuh ba ïa kane ka WTO la seng nongrim ba kan peit bad ïada ïa ki longkmie kiba im ha ka khaïi pateng ha ki ïew ki hat ha ri lum Garo ban ym ailad ïakiwei pat ki jaidbynriew kiba na bar ba kin wan phrung khlieh ha ka kam khaïi pateng lada kim don ki kot ki sla kiba biang na ka GHADC.
Kumta halor kane ka WTO ka kyntu jur ïa ki ophisar ba dei peit ha GHADC ba kin pynsted ka jingtreikam bad ai noh ïa ki Licence sha ki nongkhaïi ha ri lum Garo namar ïa ki bar jylla ka GHADC ka kloi bha ban ai Licence katba ïa ki Garo ka pynslem nalor ba ki dei ki nongdie nongpet kiba rit. Kitei ki bar jylla ki lah ban leit ïashim bynta wat sha ki ïew ki hat bar ri ruh ym ba kin wan ban knieh ïa ka jakpoh ki longkmie ha ri lum Garo.
Ka WTO ka la kynnoh ba ki don ki ophisar jongka GHADC kiba leh shilliang khmat bad pynslem ban ai licence sha ki longkmie Garo katba ki sted bha ban ai sha ki bar jylla. Kane ka long kaei kaei kaba ka seng ka sngew pyrshah jur ba ki trai ri trai muluk kin shah peit beiñ ne leh beiñ ha ri lajong bad ka WTO ka dawa na u CEM ba un shim khia ia kane ka kam ban bthah ïa kitei ki ophisar ba kim dei ban leh shilliang khmat satia.
