Shillong, Jymmang : U MDC ka Mawlai u Bah Teiborlang Pathaw ryngkat bad ki nong pynïaid shnong jong ka Mawlai Motsyiar ki la ïakynduh ïa u Symbud Myntri Rangbah ka jylla u Bah Prestone Tynsong na ka bynta ka surok ban pynïasoh bad ka Mawlai Umjaiur.
Katei ka jingïakynduh jong ki ka long halor ban wad lad wad lynti na bynta ka jing thrang ka shn ong Motsyiar kaba la don kumba 30 snem eiei ïa kaba ka la angnud ban ïoh ïa ka surok kaba pynïasoh bad ka Shnong Umjaiur khnang ban suk ka leit ka wan ki nongshong shnong.
Na ka liang u Rangbah shnong Mawlai Motsyiar u bah MW Nongbri u la aiti ïa ka dorkhas (Memorandum) ha u Bah Prestone Tynsong bad na ka liang u Symbud myntri khlem pynslem ula phone bad bthah ïa ki ophisar ka department ba kin leit sha jaka (site) ban bishar bniah ha kane hi ka taïew bad u Bah Teiborlang Pathaw ula kyrpad ïa u ban un ïarap khnang ïa kane ka jingangnud ka shnong.
Shuh shuh na ka liang u bah Teibor u la pynpaw ba ki kyrmen skhem ba kane ka kam kan long kaba seisoh khnang ba ki paidbah nongleit nongwan kin kham suk ha ka ba ïadei bad ka leit ka wan.
