Nongstoiñ, Jymmang 12: Ka jingdawa jong ki paitbah bad ki sengbhalang, ban kyntiew noh ïa ka Rambrai Primary Health Centre sha ka Community Health Centre, haduh mynta kam pat urlong satia wat la ïa ka jaka ban shna ïa katei ka CHC, la dep ïoh bad la pynbit pynbiang ruh ïa ka soskular hapdeng ka kong Kwintina Kharbai bad ka ïing ka sem naduh ka 27 tarik Kyllalyngkot 2016.
Ha katei ka soskular na ka bynta katei ka jaka, la ïasoi lang ruh da u Medical & Health Officer bad u pharmacist jong katei ka PHC bad la phah sha u Distric Medical & Health Officer jong ka West Khasi Hills ba un leh ïa kaba donkam, hynrei haduh kine ki sngi kam shym pat la urlong haduh mynta.
Dei ruh hadien ba katei ka jingïasoikam shym la treikam, ka kong Kharbani kum ka trai khyndew kam sngew tynnad satia. Kumta ha ka 13 tarik jong u bnai Risaw 2021, ka la phah biang da ka jingthoh sha u District Medical & Health Officer West Khasi Hills, ba lada katei ka jingthmu ban shna ïa ka CHC ym lah ban pynurlong, u DM & HO bad ka ophis jong u kin sngewbha ban pynthikna, khnang ba ïa katei ka soskular kaba la suh lang ruh ïa ka map bad ka jingheh ka jaka kin ïoh ban ïapyndam noh.
Wat la ka kong Kharbani ka la phah da katei ka jingthoh, hynrei haduh mynta ka Ophis jong u Distric Medical & Health Officer, kam shym la ai jingtip la da ka ktien ne da ka jingthoh. Kumta sa shisien pat ha ka 12 tarik jong u bnai Ïaïong mynta u snem, katei ka longkmie ka la phah biang da ka jingthoh sha u DM&HO ban pynkynmaw biang halor katei ka bynta, ha kaba la ai kopi ruh sha u bah Kimfa S Marbañiang MLA bad u bah Bajop Pyngrope MDC ka Rambrai Jyrngam ba kin peit lem bad leh ïa kaba donkam.
Halor ka jingbym lah ban pynurlong ban shna ïa katei ka CHC, katei ka longkmie kam sngew tynnad shuh namar ba la shu iehnoh shrah ïa katei ka jaka la phra snem kynthih. Kumta kam banse ban pynkynmaw bad ban kyntu ba lada ka ophis jong u DM & HO bad ka sorkar kim kwah ban kyntiew kyrdan ïa katei ka PHC sha ka CHC, ki dei ban da pynshai khnang ba ka trai jaka kan pyndonkam noh ha kaba rep ba riang, ban trei ban ktah lane ban pyndonkam ha kiwei pat ki jingdonkam.
