Shillong, Nailar 12: Ka Assam Rifles ka la pynlong ïa ka prokram ai jingsumar ba kyrpang kaba ar sngi na ka bynta ki shipai jong ka bad kiba haïing, ha kaba la ïashim bynta da u doktor ba pawnam jong ka Ayurveda bad Siddha u Dr. K. Vasu. Ïa kane ka prokram la pynlong ha Assam Rifles Garrison, Laitkor naduh ka 11 tarik u Nailar haduh 12 tarik u Nailar 2025, kaba ai ïa ka jingsumar ba pura kaba don tynrai ha ka pateng jong ka koit ka khiah hyndai jong ka India.
U Dr. K Vasu, u briew uba la shah burom bha ha ka liang ka jingsumar tynrai, u pawnam namar ka jingpynïasoh lang ïa ka jingstad jong ka Ayurveda bad ki rukom sumar jong ka Siddha ban kyntiew ïa ka lad jingsumar, ka rukom im bad ka jingpynkoit da ki lad ki bym ktah ïa ka met. Ha ka jingleit jong u, u peit hi ïa ki nongpang, u la ai jingmut halor ka rukom bam bad ki jingai jingmut halor ka jingsumar katkum ki jingdonkam shimet jong ki nongwan.
Ha kine ki ar sngi, u Dr. Vasu u la peit palat 200 ngut ki Nongpang kynthup ïa ki nongtrei kiba dang shakri, ki shipai kiba la shongthait bad kiba haïing hasem. Ka rukom treikam jong u ka la pynksan ym tang ban pynbeit ïa ki jingpang kiba la don lypa hynrei ban ïalam lynti ruh ïa ki briew sha ka koit ka khiah kaba ïaineh lyngba ki dawai tynrai, ka yoga, ka jingpynleit jingmut bad ki jingpynkylla ïa ka rukom im.
Haba ai jingkren ha kane ka sngi, u Dr. K Vasu u la pynpaw ka jingsngewnguh jong u na ka bynta ka kabu ban shakri ïa ka kynhun Assam Rifles. “Ki shipai kynthei bad shynrang ba shlur jong ka Assam Rifles ki aiti ïa la ka jong ka jingim ban ïada ïa ka ri. Ka long ka burom ban noh synñiang sha ka bha ka miat jong ki da kaba ïa sam ïa ki jingmyntoi ba la paw shai jong ka dawai Ayurveda bad Siddha,” u la pynpaw.
La bun ki briew kiba wan ïashim bynta ha kane ka prokram, ha kaba ki nongwan ki la sngewnguh ïa ka jingsumar ba kyrpang, ka jingsumar ba pura bad ka lad ban tip ïa ki rukom tynrai ban pynneh ïa ka koit ka khiah bad ka jingkhlaiñ ka met. Bun ki nongïashim bynta ki la ïathuh ba ki la ïoh ïa ki jingshemphang kiba kordor shaphang ka jingpynïadei ïa ka jingkoit jingkhiah ha ka met, ka jingmut jingpyrkhat bad ka jingsngew kaba khlaiñ lyngba ki rukom sumar tynrai jong ka India.
Kane ka sienjam ka pyni ïa ka jingbteng jong ka Assam Rifles na ka bynta ka bha ka miat jong ki shipai jong ka bad kiba haïing jong ki, da kaba pynthikna ba kin ïoh ïa ki lad jingsumar bapher bapher nalor ki dawai tynrai. Da kaba khot ïa ki riewshemphang kum u Dr. K Vasu, ka Assam Rifles ka pynkhlaiñ ïa ka jingaiti jong ka ban kyrshan ïa ka koit ka khiah kaba pura na ka bynta ki shipai jong ka.
