Nongpoh, Naitung 24: Ka Meghalaya State Legal Service Authority, Shillong ryngkat ka jingïatrei lang bad ka ophis ka District Social Welfare Officer, Ri Bhoi ryngkat kiwei ki tnad treikam naduh ka tnad ka koit ka khiah, ka Community & Rural Developemnt bad ka District Legal Service Authority, Ri Bhoi ha ka sngi Saitjaiñ ki la pynlong da ka prokram ai jingsumar ei bad kumjuh ruh ban pynshai halor ki jingioh jingmyntoi na ka skhim National Legal Services Authority bad kumjuh ruh kiwei ki kam pynroi na ka sorkar kmie bad na ka sorkar jylla.
Ïa kane ka prokram la pynlong ha ka Shnong Pynthor ba hap ha Bhoirymbong C&RD Block ha Ri Bhoi, ha kaba la wan ban shim bynta lang ruh da u Nongbishar badon burom ka Meghalaya Hight Court, u Shri. Justice H.S Thangkhiew bad uba dei ruh u Executive Chairman ka MSLSA, Shillong kum u kongsan bad la sakhi lang ruh da ka jingdon lang u District & Session Judge, Ri Bhoi, u B. Joshi, ka Director ka DHS, MI, ka Kong H.C Lyndem, u Bah E. Kharmalki, Secretary ka tnad Social Welfare, u Assistant Director ka tnad Social Welfare, u Bah L.L Lyngdoh bad kynthup kiwei kiwei ki ophisar na Ri Bhoi District.
Nalor kitei ki heh sorkar bad ki nongbishar ha kane ka sngi la wan shim bynta lang ruh naduh ki paidbah jong ki lai tylli ki shnong kata ka shnong Pynthor, Mynsai, Lum Syntung bad Umden Umbathiang bad ryngkat kito kiba don ka jingduna ha ka liang ka dkhot met.
Ha kane ka prokram la buh ruh ïa ki kynja dukan (Stalls) ban pynpaw paidbah ïa ki rukom treikam ki tnad sorkar naduh ka tnad ka koit ka khiah, Election, Education, Fishery, AH& Veterinary, One Stop centre, Common Service Centre, Agriculture bad kiwei kiwei ki tnad sorkar.
Lyngba jong kane ka prokram, ki paidbah ki la ioh jingmyntoi shibun eh ban tip halor ki lad jingmyntoi ba la ioh na ka sorkar bad ruh na ka liang ki nongai jingkren ki la kren bad pynshai ba ki paidbah ki dei ban shim kabu ïa ki lad jingïarap ba ki dei ban ioh na ka sorkar.
U Bah L.Lyngdoh, Assistant Director ka tnad Social Welfare u la kren halor ki jingmyntoi ba la itp kum kata ka Child Welfare Schme, Juvenile Justice Act, ka jingktah u Drok bad ki kam shongkha khynnah ba kum ki paidbah ki dei ban tip ïa kitei ki lad jingïarap ne ki kyndon ain kiba la pyntreikam da ka sorkar na ka bynta ka jingmyntoi ki paidbah.
Ka Dr. D. Blah, Additional District Medical & Health Officer ka Ri Bhoi, ka la kren halor shibun ki skhim ba pyntreikam da ka tnad ka koit ka khiah ba kynthup kum ka JSY, JSSK, PMMVY, PMASA, National Tuberculosis Elimination Programme, National Leprosy Elimination Programme, MHIS lane ka PMJAY.
Ka Kong A.Shongwan, kaba dei ka Legal Aids Counsel DLSA ka la kren halor ki lad jingïarap ba ki paidbah ki dei ban ioh na ka skhim jong u snem 2015 ba la tip kum ka National Legal Service Authority (NALSA) ba lyngba kane ka skhim ki paidbah kin ioh ïa ka jingïada na ka bor ain lada kim shah ban bein ne shah thombor ba kin leit sha ki bor ka ain ban ioh ïa ka jingbishar kaba hok.\
Na ka liang u Justice H.S Thangkhiew haba kren ha kane ka sngi u la pynpaw ka jingkmen halor ka jinglah ban pynlong ïa kum kane ka jaid prokram ba la trei ryngkat ruh bad ka Meghalaya State Legal Service Authority ki paidbah kin ioh jingtip ym tang ïa ki skhim sorkar ba dei ban ioh jingmyntoi, hynrei ki dei ruh ban tip ïa ki lad jingarap ba ki dei ban ioh na ki bor ka aiñ kumba la buh da ka sorkar ba ki dei ban ioh ka jingïada na ki bor synshar jong ka aiñ.
U la kren shai ruh halor ka skhim ba la tip kum ka NALSA kaba dei ka jingïarap na ka sorkar na ka bynta ban ioh jingïada kito kiba duk ba kyrduh lada ki shah thombor ban leit ha ki bor ka aiñ na kim donkam ban pynlut pisa na ka bynta ban ioh ïa ka jingbishar kaba hok hakhmat ka aiñ.
Ïa kane ka skhim NALSA u la pyntip ruh ba la pyntreikam ha man la ki District jong ka jylla bad hapoh ka jylla bad ryngkat ka jingïarap kita ki Para Legal Volunteer (PLV) ha man la ki shnong ba lada don kino kino kiba shah thombor ne shah lehbein ki dei ban leit sha ka ain bad ka aiñ kan ai ka jingïada bad ka jingbishar kaba hok.
La pynkut ruh ïa kane ka prokram da ka jingsam ïa ki tiar ba donkam kito kiba don ka jingduna ha ka liang ka dkhot met bad pynkut da ka jingrwai jong ka National Anthem.
