Nongpoh, Nohprah 08: Na ka bynta ban dang bteng ïa ki kam shakri ïa ki para doh ki para snam bad ïa ka imalang ka sahlang ha ka lama ka ka Hynniewtrep National Youth Front (HNYF), u President ba rangbaha ka HNYF, u Bah Sadon Blah ha ha ka 7 tarik u Nohprah 2022 u la wan ban shim bynta na ka bynta ban pynskhem ïa ki nongïalam ba thymmai ka HNYF Nongpoh Circle kum kita ki dkhot ba pura ka seng katkum ki riti treikam jong ka seng.
Ïa kine ki nongïalam ba thymmai ka HNYF Nongpoh Circle la pynskhem da u Bah Sadon Blah kum u nongïalam ba ranghah ha ka jingïalang kaba la long ha Dorbar Hall Nongpoh bad ba la sakhi lang da ka jingdon lang u President ka HNYF Northern Region, u Bah Marcus Marten, u Secretary, u Bah Edelbert Nongrum, u Vice president, u Bah J.M Cyne bad kynthup kiwei kiwei ki nongnïalam bad ki dkhot ka HNYF na sengkmie bad na Ri Bhoi District.
Kitei ki nongïalam ka HNYF Nongpoh Circle kiba la pynskhem da u Nongïalam ba rangbah, u Bah Sadon Blah ki kynthup ïa u President ba la jied ïa u Bah Robert Thabah, Vice president, Syrpailang Makdoh, General Secretary, bah Fullbok Lyngdoh, Assistant Secretary, Bah Virbor Khongbeh, Finance Secretary, Bah Kyrshïan Urïah bad kynthup kiwei kiwei ki nongïalam bad ki dkhot ka executive Committee.
Haba kren ha kane ka jingïalang pynbam smai ïa kitei ki nongïalam ba thymmai ka HNYF Nongpoh Circle, u President ba rangbah ka HNYF, u Bah Sadon Blah u la ai mynsiem ïa kine ki nongïalam ba kin shim ïa kata ka lyngkor nongïalam da ka jingkitkhlieh bad ym da kano kano kaba shu pynbor, namar ban shim ïa ka lyngkor nongïalam ki hap ban kynduh shibun ki jingtynjuh na ka bynta ban ïada ïa ka ri bad ka jaid bynriew.
Na ka lïang u Bah Sadon K. Blah kum u nongïalam ba rangbah ka HNYF, u la kren ruh halor shibun ki phang kiba ktah ïa ka ri bad ka jaid bynriew, bad kum ki nongïalam ka seng pat ki hap ban shim ïa kata ka jingkitkhlieh ban ïada ïa ki para doh ki para snam bad ruh ba kim dei ban long kita ki nongïalam tang ban myntoi ïa lade shimet bad ban myntoi ka ri bad ka jaid bynriew.
